પશ્ચિમ રેલવેમાં રાજકોટ ડિવિઝને ઉતારૂઓની ગ્રાહક તરીકેની સેવામાં ફરી એકવાર શ્રેષ્ઠતા સાબિત કરી દીધી છે. નાણાકીય વર્ષ ૨૦૨૪-૨૫ માટે "રેલમદદ" એપ દ્વારા પશ્ચિમ રેલવેમાં કુલ ૨.૩૭ લાખ ફરિયાદો મળી હતી, જેમાંથી રાજકોટ ડિવિઝનમાં માત્ર ૫.૭% એટલે કે લગભગ ૧૨ હજાર ફરિયાદો મળી હતી. આ ફરિયાદોના નિરાકરણમાં રાજકોટ ડિવિઝનનો સરેરાશ નિરાકરણ સમય 22 મિનિટ હતો, જે પશ્ચિમ રેલવેના અન્ય કોઈપણ ડિવિઝનની તુલનામાં સૌથી ઝડપી છે. ઉપરાંત, ઉત્તમ પ્રતિસાદ મેળવવામાં રાજકોટ ડિવિઝન પશ્ચિમ રેલવેમાં ટોચ પર રહ્યું છે. જે બદલ હેડ ક્વાર્ટર ખાતે ૭૦મા રેલ સપ્તાહ સમારોહ દરમિયાન રાજકોટ ડિવિઝનલ રેલ્વે મેનેજર અશ્વની કુમારને આ રેલ મદદ શિલ્ડ અર્પણ કરવામાં આવી હતી.

અત્રે યાદ રહે "રેલમદદ" એપ પ્લેટ ફોર્મ ઉપર દૈનિક ધોરણે પ્રાપ્ત થતી વિવિધ જાહેર ફરિયાદોનું વિવિધ સ્તરે વરિષ્ઠ રેલવે અધિકારીઓ દ્વારા તેનું નજીકથી નિરીક્ષણ કરીને સતત પ્રયાસોના પરિણામે રાજકોટ ડિવિઝન ફરિયાદોનું ઝડપી નિવારણ કરવામાં સક્ષમ બન્યું છે, જેમાં વર્ષ 2024-25 માટે જાહેર ફરિયાદોના નિવારણમાં પશ્ચિમ રેલવેના તમામ ડિવિઝનોમાં ટોચનું સ્થાન મેળવ્યું છે.

રાજકોટ ડિવિઝનલ રેલ્વે મેનેજર અશ્વની કુમારે આ સિદ્ધિ બદલ એડિશનલ ડિવિઝનલ રેલ્વે મેનેજર કૌશલ કુમાર ચૌબે, સિનિયર ડિવિઝનલ કોમર્શિયલ મેનેજર સુનિલ કુમાર મીના, ડિવિઝનલ કોમર્શિયલ ઇન્સ્પેક્ટર (જાહેર ફરિયાદ) વિકાસ અધિયારુ અને રેલમદદ રાજકોટની સમગ્ર ટીમને અભિનંદન આપ્યા હતા અને ભવિષ્યમાં પણ આ જ ગતિ જાળવી રાખવા માટે પ્રોત્સાહિત કર્યો હતા.

"રેલમદદ" એપ

ઉતારૂઓ "રેલ મદદ" એપ ડાઉનલોડ કરી તેમાં ઉપલબ્ધ વિવિધ માધ્યમો દ્વારા તેમની ફરિયાદો નોંધાવી/ નોંધણી કરાવી શકે છે, જેમ કે સત્તાવાર સોશિયલ મીડિયા હેન્ડલ્સ, હેલ્પલાઇન નંબર ૧૩૯, સેન્ટ્રલાઇઝ્ડ પબ્લિક ગ્રીવન્સ રિડ્રેસલ એન્ડ મોનિટરિંગ સિસ્ટમ (સીપીજીઆરએએમએસ), મોબાઇલ એપ, વેબ, એસએમએસ, ઈ-મેલ વગેરેનો સમાવેશ થાય છે.