રાજકોટના ઈન્દિરા સર્કલ પાસે ગત બુધવારે સિટી બસે 7 જેટલા વાહનોને અડફેટે લેતા ચાર લોકોના મોત થયા હતા અને ચાર જેટલા લોકોને ઇજા પહોંચી હતી. આ ઘટનાની શાહી સૂકાઈ નથી ત્યાં આજે ફરી સિટી બસના ચાલકે પોપટપરાના નાલા પાસે ટુ-વ્હીલર ચાલક મહિલાને ઠોકર મારી હતી.  જોકે, આ બનાવમાં કોઈ જાનહાનિ થઈ નથી.

સિટી બસ રૂટ નં. 37ના ચાલકે ટુ-વ્હીલર સવાર મહિલાને ઠોકરે ચડાવી હતી

મળતી માહિતી પ્રમાણે પોપટપરાના નાલા પાસે સિટી બસ રૂટ નં. 37ના ચાલકે ટુ-વ્હીલર સવાર મહિલાને ઠોકરે ચડાવી હતી. જોકે, સદનસીબે આ અકસ્માતમાં કોઈ જાનહાનિ થઈ નહોતી. પરંતુ સિટી બસના ચાલકો હજુ અમે નહીં સુધરીએ તેમ માનીને બેફામ ડ્રાઈવિંગ કરતા હોવાથી લોકોમાં રોષ જોવા મળી રહ્યો છે.