સુતા સુતા બાઇક ચલાવી વિડીયો વાયરલ કર્યો : જોખમી સ્ટંટની રીલ બનાવનારા સામે કડક પગલા

જામનગરમાં બે દિવસ પહેલા સોશ્યલ મિડીયા પર સુતા સુતા બાઇક ચલાવી સ્ટંટ કરતો વિડીયો વાયરલ થયો હતો જે અંગે પોલીસે તપાસ કરીને સ્ટંટબાઝને પકડી પાડયો છે. સોશ્યલ મિડીયા પર જોખમી સ્ટંટની રીલ બનાવી વાયરલ કરનારા સામે કડક પગલા લેવાશે.
જામનગર એસપી પ્રેમસુખ ડેલુએ જીલ્લામાં બાઇક સ્ટંટ કરી તેનો વિડીયો ઉતારી સોશ્યલ મિડીયામાં પોસ્ટ કરનારાઓને તાકીદે પકડી પાડવા સુચના કરેલ હોય જે અનુસંધાને આ દિશામાં તપાસ હાથ ધરવામાં આવી હતી, ડીવાયએસપી ડી.પી. વાઘેલા, સીપીઆઇ પી.એલ. વાઘેલાના માર્ગદર્શન મુજબ પંચ-બીના પીએસઆઇ એમ.વી. મોઢવાડીયાની રાહબરી હેઠળ ટીમ તપાસમાં હતી.
દરમ્યાન બે દિવસ પુર્વે સોશ્યલ મિડીયામાં બાઇક સ્ટંટબાઝનો વિડીયો ઇન્સ્ટાગ્રામ એકાઉન્ટમાં પોસ્ટ કરેલ હોય જે અંગે ખાનગી બાતમીદારોથી સોર્સ મેળવીને પેટ્રોલીંગમાં હતા ત્યારે પંચ-બીના એએસઆઇ વી.ડી. રાવલીયા, સુમિતભાઇ, ભયપાલસિંહ, મેહુલભાઇને હકીકત મળેલ કે ન્યુઝ તેમજ ઇન્સ્ટાગ્રામમાં અપલોડ કરેલ સ્ટંટના વિડીયોમાં સ્ટંટ કરતો શખ્સ ધર્મેન્દ્ર શિતલાપ્રસાદ ગુપ્તા રહે. મોહનનગર આવાસ, બિલ્ડીંગ નં. ૧૦, ધંધો કલરકામવાળો હાલ હાપા માર્કેટ યાર્ડ પાસે ઉભો છે.
આ હકીકત આધારે પોલીસ ટુકડી ત્યાં દોડી જઇ સ્ટંટબાઝને પકડી પાડી તેના વિરુઘ્ધ પંચ-બીના કોન્સ. ભયપાલસિંહ જાડેજાએ ફરીયાદ આપી હતી કે સ્પ્લેન્ડર બાઇક નં. જીજે૧૦સીકે-૨૨૫૫ના ચાલક ધર્મેન્દ્ર ગુપ્તા બાઇક યાર્ડ રોડ પર પુરઝડપે બેદરકારીથી ચલાવી પોતાની તથા રાહદારીઓની જીંદગી જોખમાય તે રીતે બાઇક પર સુતા સુતા ચલાવી સ્ટંટ કરી ગુનો આચર્યો છે.