મહિલાને માથામાં ઇજા થતાં હોસ્પિટલ લઇ જવાઇ

દ્વારકા જગત મંદિરના હિસાબે હજારોની સંખ્યામાં દરરોજ યાત્રિકો દર્શનાર્થે આવતા હોય છે. જેના હિસાબે મંદિર ચોક હર હંમેશ યાત્રિકોની ભીડ રહેતી હોય છે. ગુરુવારે મોડી સાંજે મંદિર ચોક વિસ્તારમાં આવેલ એક જીર્ણ થઈ ગયેલ બિલ્ડીંગના રવેશનું સિમેન્ટનું પોપડુ નીચે ઊભેલી એક યાત્રિક મહિલાના માથે પડતા તેને ગંભીર ઇજાઓ પહોચી હતી. ૧૦૮ દ્વારા ઘાયલ મહિલા યાત્રિકને દ્વારકા સિવિલ હોસ્પિટલમાં લઈ જવામાં આવી હતી અને સારવાર આપવામાં આવી હતી.
ઉલ્લેખનીય છે કે, ભરચક રહેતા મંદિર ચોકમાં આવેલી આ બિલ્ડીંગ વર્ષો જૂની હોય અતિ ઝીર્ણ થઈ ગયેલ છે જેના હિસાબે ગંભીરથી અતિ ગંભીર અકસ્માત સર્જવાનો ભય રહેલ છે. જેના લીધે તંત્ર દ્વારા આ બિલ્ડીંગને તોડી પાડવામાં આવે તેવી લોકમાંગણી ઉઠવા પામી છે.