અમદાવાદના ઓઢવમાં અરેરાટી મચાવી દેતી ઘટના બની છે. પરિણીતાએ પોતાના ત્રણ સંતાનો સાથે કોલ્ડ્રીંક્સમાં ઘઉંની દવા ભેળવી પી લેતા ચારેયને હોસ્પિટલ ખસેડવામાં આવ્યા હતા. જેમાં પરિણીતા અને તેના માસુમ પુત્રનું મોત નીપજ્યું છે. જ્યારે બે બાળકી સારવાર હેઠળ છે. પરિણીતાએ પહેલા સંતાનોને કોલ્ડ્રીંક્સમાં નાખેલી દવા પીવડાવી હતી અને બાદમાં પોતે પી ગઈ હતી. પરિણીતાએ લખેલી સુસાઇડ નોટ પણ પોલીસને મળી આવી છે. જેમાં લખ્યું છે કે, મમ્મી-પપ્પા હું બહુ થાકી ગઈ છું.

બે બાળકીઓ સારવાર હેઠળ
પ્રાપ્ત વિગત મુજબ, ઓઢવમાં પરિણીતા કૃપા પંચાલ તેના પતિ, એક પુત્ર વ્રજ અને બે પુત્રીઓ મેશ્વા અને દિવ્યા સાથે રહેતી હતી. આજે સવારે પરિણીતાએ તેના ત્રણેય બાળકો સાથે આપઘાતનો પ્રયાસ કર્યો હતો. કોલ્ડ્રીંક્સમાં ઘઉંમાં નાખવાની દવા નાખી અને ત્રણેય બાળકોને પીવડાવી દીધી હતી. ત્યારબાદ પોતે પણ પી લીધું હતું. ત્રણેયને ઉલટીઓ થવા લાગતાં તાત્કાલિક ધોરણે સારવાર અર્થે હોસ્પિટલ ખસેડવામાં આવ્યા હતા, જ્યાં પરિણીતા કૃપા અને તેના બે વર્ષના પુત્ર વ્રજનું મોત થયું હતું. જ્યારે બે બાળકીઓ હાલ સારવાર હેઠળ છે. ઘટનાની જાણ થતા ઓઢવ પોલીસ પણ તાત્કાલિક ઘટનાસ્થળે પહોંચી ગઈ હતી.

પરિણીતાના સુસાઈડ નોટમાં શું લખ્યું?
ઓઢવ પોલીસ દ્વારા પરિણીતાના ઘરે તપાસ કરવામાં આવી ત્યારે પોલીસને સુસાઇડ નોટ મળી આવી છે. પરિણીતાએ સુસાઇડ નોટમાં મોત માટે કોઈને જવાબદાર ગણાવ્યા નથી. પરિણીતાએ સુસાઈડ નોટમાં લખ્યું છે કે, મમ્મી-પપ્પા હું બહું થાકી ગઈ છું. મારે અને મારા છોકરાને નથી જીવવું. મારા ગયા પછી તમે રડતા નહીં અને મને અને મારા છોકરાને અગ્નિ તમે જ આપજો. તમારી દીકરી તરીકે મને વિદાય આપજો તમારી વહું તરીકે વિદાય ન આપતા. એના હાથે સિંદુર પણ ન પુરાવતા મારે તમારા ઘરે પાછું નથી આવવું, હું કોઈના એટલે કોઈના પર બોઝો બનવા નથી માંગતી કે મારા છોકરાઓને નથી બનાવવા માંગતી એટલે હવે હું હવે આ પગલું ભરી રહી છું. આ ઘરમાં હવે મારું અને મારા છોકરાઓનું કંઈ જ નામોનિશાન ન રહેવું જોઈએ, હું કે મારા છોકરાઓ હોઈએ કે ના હોઈએ કશું જ ફરક નથી પડતો. બસ હવે હું જઉં, પપ્પા-મમ્મી, ભાઈ તમે અમને લોકોને યાદ કરીને રડતા નહીં. હંમેશા ખુશ રહેજો તમે લોકો.