સૌરાષ્ટ્રને દક્ષિણ ગુજરાત સાથે જોડતી અને યાત્રીકોની સુવિધા વધારવા હેતુસર રેલ્વે તંત્રે વેરાવળથી સુરત વચ્ચે સાપ્તાહિક ટ્રેન દોડાવવાનું આયોજન કર્યુ છે. જે અંગે માહિતી આપતા ડીસીએમ માશૂક અહમદએ જણાવેલ કે, આ સાપ્તાહિક ટ્રેન ૧૨ ડિસે.થી ૩૦ જાન્યુ.૨૦૨૪ સુધીના સમયગાળા દરમ્યાન ચલાવવાનો નિર્ણય થયો છે. જે મુજબ આ સાપ્તાહિક વિશેષ ટ્રેન નં.૦૯૦૧૮ વેરાવળથી દર મંગળવારે સવારે ૧૧.૦૫ કલાકે ઉપડશે અને તે જ દિવસે રાત્રે ૨૩.૪૫ કલાકે સુરત પહોંચશે. આવી જ રીતે ટ્રેન નં.૦૯૦૧૭ સુરત-વેરાવળ સાપ્તાહિક વિશેષ ટ્રેન દર સોમવારે સુરતથી સાંજે ૧૯.૩૦ કલાકે ઉપડશે અને બીજા દિવસે સવારે ૮.૦૫ કલાકે વેરાવળ પહોંચશે. આ ટ્રેન માળીયા હાટીના, કેશોદ, જૂનાગઢ, જેતલસર, ગોંડલ, રાજકોટ, અમદાવાદ અને વડોદરા સ્ટેશન પર બંન્ને દિશામાં ઉભી રહેશે. આ ટ્રેનનું બુકિંગ પેસેન્જર રિઝર્વેશન સેન્ટર્સ અને  વેબસાઇટ પર શરૂ થઈ ગયુ છે.