રાજકોટ શહેરમાં દર ચોમાસે ડામર રસ્તા ધોવાઇ જાય છે અને કમરતોડ ખાડા પડી જાય છે. ડામર રોડમાંથી જ્યારે ભ્રષ્ટાચારના પોપડા ઉખડે ત્યારે દોષનો ટોપલો મેઘરાજા ઉપર ઢોળીને બધા જ નિર્દોષ છૂટી જાય છે. ક્યારેય મહાપાલિકા તંત્ર કે કોન્ટ્રાકટર એજન્સીઓનો કોઈ વાંક હોતો જ નથી. હવે વોર્ડવાઇઝ અને રોડ વાઇઝ ડામર રોડને નુક્સાનીનો સર્વે થશે, સરકારમાં રિપોર્ટ થશે અને નવા રસ્તા બનાવવા ગ્રાન્ટ માંગવામાં આવશે. આ બધું વર્ષોથી ચાલે છે. આ બધું બંધ થાય કે ન થાય ડામર રસ્તા ઉપર પડેલા ખાડાનું રિપેરિંગ થઇ જાય તો નાગરિકોને રાહત થશે. ઉપરોક્ત તસ્વીરમાં જવાહર રોડ ઉપર ગેલેક્સી હોટેલથી આગળ પડેલા ખાડા તસ્વીરમાં દ્રશ્યમાન થાય છે.