ગુજરાત હાઈકોર્ટે આ વર્ષે વડોદરામાં બનેલી હરણી બોટ દુર્ઘટનામાં રાજ્ય સરકાર દ્વારા રજૂ કરાયેલ તપાસ અહેવાલને ફગાવી દીધો છે અને નવેસરથી તપાસ કરવાનો આદેશ આપ્યો છે. બુધવારે રજૂ કરાયેલા અહેવાલમાં ભૂતપૂર્વ અધિકારીને ક્લીનચીટ આપવા અને તળાવની કામગીરી માટે એક અસમર્થ પેઢીને કોન્ટ્રાક્ટ આપવાના તેમના નિર્ણય પર પ્રશ્નો ઉભા થયા છે. જે બાદ હાઈકોર્ટે આકરી ટીપ્પણી કરતા કહ્યું કે તમે આ રિપોર્ટ પાછો ખેંચી લો નહીં તો અમે ગંભીર ટિપ્પણી કરીશું.

અકસ્માતના છ મહિના પછી આવો અહેવાલ તૈયાર કરવા અને સબમિટ કરવા બદલ હાઈકોર્ટે શહેરી વિકાસ અને શહેરી ગૃહ નિર્માણ વિભાગના અગ્ર સચિવ (પીએસ)ની પણ ટીકા કરી હતી. આ દુર્ઘટનામાં કુલ 14 લોકોના મોત થયા છે. આ ઘટના 18 જાન્યુઆરીએ વડોદરા શહેરના હરણીના મોટનાથ તળાવમાં બની હતી, જ્યારે બોટ પલટી જતાં 12 વિદ્યાર્થીઓ અને બે શિક્ષકોના મોત થયા હતા.

ચીફ જસ્ટિસ સુનીતા અગ્રવાલ અને જસ્ટિસ પ્રણવ ત્રિવેદીની ડિવિઝન બેંચ આ ઘટના પર દાખલ કરાયેલી પીઆઈએલની સુનાવણી કરી રહી છે. અહેવાલ પર નારાજગી વ્યક્ત કરતા, બેન્ચે કહ્યું કે કોન્ટ્રાક્ટર પ્રોજેક્ટને લેવા માટે લાયક ન હોવા છતાં તેમને અપાયો અને હવે વડોદરાના તત્કાલીન મ્યુનિસિપલ કમિશનરને બચાવવાનો પ્રયાસ કરાયો છે. વડોદરા મ્યુનિસિપલ કોર્પોરેશન (VMC) એ લેકસાઇડ પ્રોજેક્ટના જાળવણી અને સંચાલન માટે કોટિયા પ્રોજેક્ટ્સ નામની પેઢીને કોન્ટ્રાક્ટ આપ્યો હતો, જેના ભાગીદારોની પાછળથી અકસ્માત માટે જવાબદાર તરીકે ધરપકડ કરવામાં આવી હતી. 

ચીફ જસ્ટિસે કહ્યું, 'તત્કાલીન કમિશનરે પોતે જ તે કોન્ટ્રાક્ટરને વર્ક ઓર્ડર આપતા ઓર્ડર પર સહી કરી હતી, તેથી તે જ વ્યક્તિ હતા જેમણે મંજૂરી આપી હતી. એક સામાન્ય માણસ પણ જોઈ શકે છે કે કોન્ટ્રાક્ટર લાયક નથી. પરંતુ, રિપોર્ટમાં કહેવામાં આવ્યું છે કે તેણે કંઈ ખોટું કર્યું નથી. અમે નિષ્પક્ષ અને યોગ્ય તપાસ ઈચ્છીએ છીએ. આ રિપોર્ટ પાછો ખેંચો અને નવેસરથી તપાસ કરો.

મુખ્ય ન્યાયાધીશે શહેરી વિકાસ અને શહેરી ગૃહ નિર્માણ વિભાગના અગ્ર સચિવ (પીએસ)ની પણ આવો અહેવાલ તૈયાર કરવા અને સબમિટ કરવા બદલ આકરી ટીકા કરી હતી. ચીફ જસ્ટિસ સુનીતા અગ્રવાલે તેમને ચેતવણી આપતાં કહ્યું, 'પીએસ એમ ન કહી શકે કે તેમણે (મ્યુનિસિપલ કમિશનર) આ રીતે કામ કરવું જોઈએ, આનો અર્થ એ થયો કે તેમની (MC) તરફથી કોઈ ભૂલ નહોતી. મ્યુનિસિપલ કમિશનરે ટેન્ડર મંજૂર કર્યું, છતાં તેમની ભૂલ નથી? આવા અહેવાલો કોર્ટમાં રજૂ કરી શકાય નહીં. તમે કાં તો આ રિપોર્ટ પાછો ખેંચી લો અને નવો રિપોર્ટ દાખલ કરો, નહીં તો અમે ખૂબ ગંભીર ટિપ્પણી કરીશું.

રાજ્ય સરકાર તરફથી હાજર રહેલા એડવોકેટ જનરલ કમલ ત્રિવેદીએ શરૂઆતમાં રિપોર્ટનો બચાવ કરવાનો પ્રયાસ કર્યો, પરંતુ બાદમાં સ્વીકાર્યું કે 'કદાચ ભાષા વધુ સારી બની શકી હોત'. આ પછી એડવોકેટ જનરલે કોર્ટના નિર્દેશો સાથે સંમત થયા અને કહ્યું કે રાજ્ય સરકાર નવેસરથી તપાસ કરશે અને નવો રિપોર્ટ રજૂ કરશે. બેન્ચે આ મામલે વધુ સુનાવણી માટે 12 જુલાઈની તારીખ નક્કી કરી છે. 27 જૂને છેલ્લી સુનાવણી દરમિયાન, જ્યારે રિપોર્ટ કોર્ટમાં રજૂ કરવામાં આવ્યો હતો, ત્યારે બેન્ચે કહ્યું હતું કે રિપોર્ટમાં તત્કાલીન મ્યુનિસિપલ કમિશનર (MC)ને બચાવવાનો પ્રયાસ કરવામાં આવ્યો હતો.