બોલિવૂડના પ્રતિભાશાળી કલાકારોમાંથી એક નવાઝુદ્દીન સિદ્દીકી આ દિવસોમાં પોતાના અંગત જીવનને કારણે ચર્ચામાં છે. અભિનેતાને તેની પત્ની આલિયા સિદ્દીકી સાથે વિવાદ ચાલી રહ્યો છે. આ મામલે આજે બોમ્બે હાઈકોર્ટમાં સુનાવણી હાથ ધરવામાં આવી હતી. કોર્ટે નવાઝુદ્દીન, તેની પત્ની અને ભાઈને 3 એપ્રિલે હાજર થવાનો આદેશ આપ્યો છે. કોર્ટે નવાઝની પત્ની આલિયા સિદ્દીકી અને ભાઈ શમશુદ્દીન સિદ્દીકીને પોતાનો કેસ રજૂ કરવા હાજર રહેવા કહ્યું છે. આ દરમિયાન તેમના બાળકોની કસ્ટડીને લઈને કોર્ટમાં સમાધાન થઈ શકે છે. તમને જણાવી દઈએ કે નવાઝે પોતાની અલગ થઈ ગયેલી પત્ની આલિયા વિરુદ્ધ માનહાનિનો કેસ દાખલ કર્યો છે.

નવાઝુદ્દીન સિદ્દીકી પર તેની પત્ની આલિયા સિદ્દીકી અને શમસુદ્દીન સિદ્દીકીએ આરોપ લગાવ્યો હતો. જે બાદ અભિનેતાએ તેની સામે માનહાનિનો કેસ પણ દાખલ કર્યો હતો. નવાઝુદ્દીન સિદ્દીકીએ આ બદનક્ષી કેસની અરજી બોમ્બે હાઈકોર્ટમાં દાખલ કરી આલિયા અને તેના ભાઈ પર 100 કરોડ રૂપિયાના નુકસાનની માંગણી કરી છે. નવાઝે આરોપ લગાવ્યો છે કે આ બંનેએ મળીને તેમની સામે પાયાવિહોણા નિવેદનો અને આરોપો લગાવ્યા છે.
​​​​​​​

આ બધાની વચ્ચે, આલિયા સિદ્દીકીએ તાજેતરમાં ઇન્ટરવ્યુમાં પુષ્ટિ કરી હતી કે નવાઝે કરાર માટે તેનો સંપર્ક કર્યો હતો. બંને જલ્દી છૂટાછેડા લેશે. તે જ સમયે, તેણે એમ પણ કહ્યું કે તે તેના બાળકોની કસ્ટડી માટે લડશે. આલિયાએ કહ્યું કે નવાઝે બાળકોની કસ્ટડી માટે અરજી પણ કરી છે પરંતુ મારા બાળકો મારી સાથે રહેવા માંગે છે તેથી હું તેમની કસ્ટડી માટે લડીશ.