રાજકોટ, લોધિકા અને પડધરી તાલુકાના ૧૮૦ ગામોનું કાર્યક્ષેત્ર ધરાવતા રાજકોટના બેડી માર્કેટ યાર્ડમાં આજે ૧૬ લાખ કિલો ઘઉંની આવક શરૂ થઇ હતી, હાલ સુધી ઘઉંની મિલો અને હોલસેલર્સ દ્વારા ખરીદી થઇ રહી હતી, જ્યારે હવે ધૂમ આવક શરૂ થતાં ગ્રાહકોએ બારમાસી ખરીદી શરૂ કરી છે.

વિશેષમાં રાજકોટ માર્કેટ યાર્ડના વેપારી વર્તુળોએ જણાવ્યું હતું કે, યાર્ડમાં તમામ જણસીઓમાં આજે સૌથી વધુ ૮૦,૦૦૦ મણ (૧૬ લાખ કિલો) ઘઉંની આવક નોંધાઇ હતી. ઘઉંની સીઝનના પ્રારંભે પ્રતિ ૨૦ કિલોનો ભાવ રૂ.૬૦૦ સુધી હતો, દરમિયાન હવે ઉત્તરોતર આવક વધવા લાગતા ભાવ ઘટીને ટોપ ક્વોલિટીમાં રૂ.૫૫૦ સુધી જળવાય રહ્યા છે. દરમિયાન આજે ઘઉં ટુકડામાં પ્રતિ ૨૦ કિલોનો ભાવ ગુણવત્તા અનુસાર રૂ.૪૯૧થી ૫૫૦ અને લોકવનમાં રૂ.૪૯૭થી ૫૨૧ સુધી રહ્યા હતા.