આજ સવારથી બપોર સુધીમાં જામનગર શહેરમાં શ્રેણીબદ્ધ ધડાકાઓ સંભળાતા અને ધડાકાઓની તિવ્રતા વધુ હોવાના કારણે ઊંચી ઈમારતોના કાચ ખળભળી ઉઠતાં ચર્ચા જાગી હતી. જો કે, હવે એ બાબત સ્પષ્ટ થઈ ગઈ છે કે, મોટા ભાગે જે ધડાકાઓ થાય છે તે વાયુસેનાની પ્રેક્ટિસના હોય છે એટલે આજના ધડાકા પણ આ જ પ્રકારના હોવાની પૂરી સંભાવનાઓ છે. 


સવારના ૯ વાગ્યા બાદથી ધડાકાઓ સંભળાવાનું શરૂ થયું હતું અને સમયાંતરે પ્રચંડ ધડાકાઓ થતાં હતાં જેનાથી ઊંચી ઈમારતોમાં રીતસરની ધ્રુજારી અનુભવાતી હતી. બિલ્ડિંગોના બારી-બારણાં અને કાચ પણ ખખડવા લાગ્યા હતાં.


એક વ્યક્તિની ગણતરી મુજબ લગભગ ર૦થી વધુ ધડાકા બપોર સુધી થયાં હતાં, આ સંબંધે ‘આજકાલ’ દ્વારા જામનગરના સિસ્મોલોજી વિભાગનો સંપર્ક કરવામાં આવ્યો હતો ત્યારે એમણે કહ્યું હતું કે, આ ધડાકાઓ કોઈ ભૂગર્ભીય હલચલના નથી. દરમિયાનમાં જ્યારે પણ ધડાકા થતાં હતાં ત્યારે થોડી મિનિટો બાદ આકાશમાં ફાઈટર વિમાન જોવા મળતાં હતાં જેનાથી ધડાકાઓ શું કામ થતાં હતાં? એ બાબત સ્પષ્ટ થઈ હતી. જો કે, ઘણાં દિવસો બાદ એકધારા ધડાકાઓના કારણે લોકોમાં ચર્ચા જાગી હતી.

તુર્કી-સીરિયામાં સદીનો સૌથી ભયાનક ભૂકંપ આવ્યો છે, બે-ત્રણ દિવસ પહેલાં કચ્છમાં પણ ૩થી વધુની તિવ્રતાના આંચકા નોંધાયા છે અને આ બધી બાબતો જાણતાં લોકો ભૂગર્ભના ધડાકાઓને એક તબક્કે ગંભીરતાથી લઈ લે છે, પરંતુ અહીં થતાં ધડાકા ભૂગર્ભીય હલચલના નહીં હોવાનું સામે આવ્યા બાદ લોકોમાં રાહત જોવા મળી હતી.