તાજેતરના મહિનાઓમાં ભારતમાં રોજગાર દરમાં સુધારો, ચીનની મધ્ય-ગાળાની વૃદ્ધિનું અનુમાન ઘટીને ૪.૬% થયું
​​​​​​​

ભારતનો આર્થિક વિકાસ દર ટોપ-૧૦ ઉભરતી અર્થવ્યવસ્થાઓમાં સૌથી વધુ રહેવા જઈ રહ્યો છે. આટલું જ નહીં, અમેરિકન રેટિંગ એજન્સી ફિચે ભારતના મધ્ય-ગાળાના વૃદ્ધિ અંદાજને ૦.૭% વધારીને ૬.૨% કર્યો છે. ફિચ અનુસાર તાજેતરના મહિનાઓમાં ભારતમાં રોજગાર દરમાં સુધારો થયો છે. ફિચના મતે ભારતની શ્રમ ઉત્પાદકતાનો અંદાજ પણ અન્ય દેશો કરતાં સારો છે.

તેણે ૧૦ ઉભરતા દેશોના વિકાસ અંદાજને અગાઉના ૪.૩% થી ઘટાડીને ૪% કર્યો છે. આ માટે ફિચે ચીનની અર્થવ્યવસ્થાના ઘટાડાને જવાબદાર ગણાવ્યો છે. ગ્લોબલ રેટિંગ એજન્સીએ તેના અહેવાલમાં જણાવ્યું છે કે 'આ ઘટાડો મુખ્યત્વે ચીનની સપ્લાય-સાઇડ ગ્રોથ સંભવિતતાના અંદાજમાં ૦.૭% પોઇન્ટના મોટા ઘટાડાને કારણે થયો છે.' ચીનની મધ્ય-ગાળાની વૃદ્ધિનું અનુમાન ૫.૩%થી ઘટાડીને ૪.૬% કરવામાં આવ્યું છે.

ભારતનો વિકાસ અંદાજ ૫.૫% થી વધારીને ૬.૨% કરવામાં આવ્યો છે જ્યારે મેક્સિકોનો વિકાસ અંદાજ ૧.૪% થી વધારીને ૨% કરવામાં આવ્યો છે. ફિચે કહ્યું છે કે ૨૦૨૩-૨૪ માટે ભારતનો વિકાસ દર ૬.૩% રહેવાની ધારણા છે.