ઈરાનના અટેક બાદ ઈઝરાયેલ પણ કરી રહ્યું છે જવાબી હુમલાની તૈયારી : “પશ્ચિમ એશિયામાં યુદ્ધના વિસ્તરણનો ભય વધ્યો”, યુએન અને જી7 દેશોએ વ્યક્ત કરી ચિંતા

    
ઈરાને રવિવારે ઈઝરાયેલ પર સીધો હુમલો કર્યો હતો અને ડ્રોન અને બેલેસ્ટિક મિસાઈલ છોડી હતી. આ પછી મધ્ય પૂર્વમાં તણાવ વધી રહ્યો છે. ત્યાંરે આ મામલે વિદેશ મંત્રી એસ. જયશંકરે રવિવારે તેમના ઈઝરાયેલના અને ઈરાનના વિદેશ મંત્રી ઈઝરાયેલ કાત્ઝ અને હોસેન અમીર-અબ્દોલ્લાહિયન સાથે ટેલિફોન પર વાત કરી હતી. ઈરાને 1 એપ્રિલના રોજ દમાસ્કસમાં ઈરાની વાણિજ્ય દૂતાવાસ પર શંકાસ્પદ ઈઝરાયેલ હવાઈ હુમલાના જવાબમાં શનિવારની મોડી રાત્રે ઈઝરાયેલ પર સેંકડો ડ્રોન અને મિસાઈલો છોડ્યા હતા, જેમાં બે જનરલ સહિત સાત ઈરાની રિવોલ્યુશનરી ગાર્ડના કર્મચારીઓ માર્યા ગયા હતા.

જયશંકરે સોશિયલ મીડિયા પ્લેટફોર્મ 'એક્સ' પર લખ્યું, 'હમણાં જ ઈઝરાયેલના વિદેશ મંત્રી ઈઝરાયેલ કાત્ઝ સાથે વાતચીત થઈ. મેં ગઈકાલના વિનાશ પર મારી ચિંતા વ્યક્ત કરી અને વ્યાપક પ્રાદેશિક પરિસ્થિતિની ચર્ચા કરી. અમે સંપર્કમાં રહેવા સંમત થયા છીએ.

ભારતે આ ઘટનાક્રમ પર ચિંતા વ્યક્ત કરી અને તાત્કાલિક તણાવ ઘટાડવાની અપીલ કરી છે. ભારતે કહ્યું કે આ ક્ષેત્રમાં તેના દૂતાવાસો ભારતીય સમુદાયના સંપર્કમાં છે. વિદેશ મંત્રાલયે કહ્યું, 'અમે ઈઝરાયેલ અને ઈરાન વચ્ચે વધી રહેલી દુશ્મનાવટથી અત્યંત ચિંતિત છીએ. તેનાથી પ્રદેશમાં શાંતિ અને સુરક્ષા જોખમાય છે. મંત્રાલય દ્વારા જારી કરવામાં આવેલા એક નિવેદનમાં કહેવામાં આવ્યું છે કે, 'અમે તણાવને તાત્કાલિક ઘટાડવા, સંયમ રાખવા, હિંસાથી દૂર રહેવા વિનંતી કરીએ છીએ.'

વિદેશ મંત્રાલયે કહ્યું કે ભારત સ્થિતિ પર નજીકથી નજર રાખી રહ્યું છે, 'આ ક્ષેત્રમાં અમારા દૂતાવાસ ભારતીય સમુદાયના સંપર્કમાં છે. તે મહત્વનું છે કે પ્રદેશમાં સુરક્ષા અને સ્થિરતા જળવાઈ રહે.

ઈરાનની સેનાએ શનિવારે સ્ટ્રેટ ઓફ હોર્મુઝ નજીક ઈઝરાયેલ સાથે જોડાયેલા એક માલવાહક જહાજને કબજે કર્યું હતું. જહાજમાં 17 ભારતીય ક્રૂ મેમ્બર સવાર હતા. પોર્ટુગીઝ ફ્લેગવાળા જહાજમાં સવાર ભારતીયોની મુક્તિ સુનિશ્ચિત કરવા માટે ભારત ઈરાનના સંપર્કમાં છે.

વિદેશ પ્રધાન જયશંકરે રવિવારે તેમના ઈરાનના સમકક્ષ હોસેન અમીર-અબ્દુલ્લાયાન સાથે વાત કરી અને પોર્ટુગીઝ-ધ્વજવાળા કાર્ગો જહાજમાં સવાર 17 ભારતીય નાગરિકોને મુક્ત કરવાની માંગ કરી. ફોન પર વાતચીત દરમિયાન જયશંકરે ઈરાન-ઈઝરાયેલ દુશ્મનાવટના સંદર્ભમાં શાંતિ, સંયમ અને મુત્સદ્દીગીરીના માર્ગ પર પાછા ફરવાનું સૂચન કર્યું હતું.

અમેરિકાએ હુમલાની ચેતવણી આપી હોવાનો તહેરાનનો દાવો નકાર્યો 

ઈરાનના વિદેશ મંત્રી હોસેન અમીરાબ્દોલ્લાહિયાને રવિવારે કહ્યું કે ઈરાને ઈઝરાયેલ પર તેના ડ્રોન અને મિસાઈલ હુમલાના લગભગ 72 કલાક પહેલા ઈઝરાયેલ અને અમેરિકાના પાડોશી દેશોને નોટિસ આપી હતી. જોકે, બિડેન વહીવટીતંત્રના એક વરિષ્ઠ અધિકારીએ જણાવ્યું હતું કે કોઈ ચેતવણી મળી નથી અને ઈરાન તેમને વધુ નુકસાન પહોંચાડવાનું લક્ષ્ય ધરાવે છે. અધિકારીએ એમ પણ જણાવ્યું હતું કે યુએસએ તેના સ્વિસ મધ્યસ્થીઓ દ્વારા ઈરાનનો સંપર્ક કર્યો હતો પરંતુ હુમલાના 72 કલાક પહેલા કોઈ સૂચના મળી ન હતી. "તે બિલકુલ સાચું નથી, તેઓએ કોઈ સૂચના આપી ન હતી. ઈરાને ઈઝરાયેલ વિરુદ્ધ હુમલા શરૂ થયા પછી જ યુએસને સંદેશો મોકલ્યો હતો.” 

“યોગ્ય સમયની રાહ”, ઈઝરાયેલની ઈરાનને ખુલ્લી ધમકી  

હુમલા બાદ, ઇઝરાયેલના પ્રધાન બેની ગેન્ટ્ઝે ધમકીભર્યા સ્વરમાં કહ્યું કે ઇરાન દ્વારા તેના પ્રદેશો પર ડ્રોન અને મિસાઇલ હુમલા પછી ઇઝરાયેલ બદલો લેશે અને "ઇરાનને તેની વાસ્તવિક કિંમત ચૂકવવા માટે અનુકૂળ સમય અને યોગ્ય પદ્ધતિ અપનાવશે." ઈઝરાયેલની ધમકી અને તેના જવાબી કાર્યવાહીને કારણે યુદ્ધનો ભય વધી રહ્યો છે. સંયુક્ત રાષ્ટ્રમાં ઈરાનના રાજદૂતે જણાવ્યું હતું કે ઈરાન તેના "સ્વ-રક્ષણના સ્વાભાવિક અધિકાર" ની કવાયતના આધારે જવાબ આપી રહ્યું છે. ઈરાનના મતે, ઈઝરાયેલ પરનો હુમલો દમાસ્કસમાં તેના વાણિજ્ય દૂતાવાસ પરના હુમલાનો પ્રતિભાવ હતો.

ઈરાન વિરુદ્ધ આક્રમક કાર્યવાહીમાં ભાગ નહીં લે અમેરિકા

પશ્ચિમ એશિયામાં વધી રહેલા તણાવ વચ્ચે અમેરિકી રાષ્ટ્રપતિ જો બિડેને સ્પષ્ટ કર્યું છે કે તેઓ ઈરાન વિરુદ્ધ કોઈપણ આક્રમક કાર્યવાહીમાં સામેલ થશે નહીં. ઈરાને શનિવારે ઈઝરાયેલ પર મિસાઈલ છોડવાનું શરૂ કર્યું હતું. ઈઝરાયેલના વડા પ્રધાન બેન્જામિન નેતન્યાહુ અને પ્રમુખ બિડેન વચ્ચેની વાતચીતમાં, બિડેને સૂચવ્યું કે વધુ પ્રતિસાદ બિનજરૂરી છે. ફોન કૉલમાં, બિડેને જણાવ્યું હતું કે શનિવારને "વિજય" ગણવો જોઈએ કારણ કે ઈરાનના હુમલા મોટાભાગે અસફળ રહ્યા હતા અને તે ઇઝરાયેલની શ્રેષ્ઠ લશ્કરી ક્ષમતા દર્શાવે છે.