YSR કોંગ્રેસ પાર્ટી (YSRCP)ના રાજ્યસભા સાંસદ બિદા મસ્તાન રાવની પુત્રીનું નામ હિટ એન્ડ રન કેસમાં સામે આવ્યું છે. આરોપ છે કે રાજ્યસભા સાંસદની પુત્રીએ સોમવારે સાંજે ચેન્નાઈમાં પોતાની લક્ઝરી BMW કારથી એક વ્યક્તિને કચડી નાખ્યો હતો. મીડિયા રિપોર્ટ્સમાં દાવો કરવામાં આવ્યો છે કે સૂર્યા નામના 21 વર્ષીય ચિત્રકારને ગંભીર ઈજાઓ થઈ હતી, ત્યારબાદ તેનું મૃત્યુ થયું હતું. આરોપી માધુરીની મંગળવારે ચેન્નાઈ પોલીસે ધરપકડ કરી હતી. જોકે  ટૂંક સમયમાં તેને જામીન પણ મળી ગયા હતા.

આ પહેલા 19 મેના રોજ પુણેના કલ્યાણી નગર વિસ્તારમાં એક સગીર છોકરાએ તેની પોર્શ કાર સાથે બાઇકને ટક્કર મારી હતી. આ અકસ્માતમાં બે યુવાન સોફ્ટવેર એન્જીનીયરના મોત થયા હતા. હાલ સગીરને પુણેના ઓબ્ઝર્વેશન હોમમાં રાખવામાં આવ્યો છે. તેના પિતા અને દાદા પણ જેલમાં છે. આ મામલાએ સમગ્ર દેશમાં ખળભળાટ મચાવી દીધો હતો.

એક ઝડપથી આવતી BMW કારે ફૂટપાથ પર સૂઈ રહેલા એક વ્યક્તિને કચડી નાખ્યો. પરિણામે તેનું મૃત્યુ થયું. પોલીસે જણાવ્યું કે આરોપી મહિલા ડ્રાઈવર અને તેની સાથે રહેલી અન્ય એક મહિલા ઘટના બાદ તરત જ સ્થળ પરથી ભાગી ગઈ હતી.