હાલ ફેડરલ ઇન્વેસ્ટિગેશન એજન્સી આ મામલાની તપાસમાં જોડાઈ, ૨૦૨૦માં ભારત સરકારે પન્નુને આતંકવાદી કર્યો હતો જાહેર



એક અમેરિકન અધિકારીએ દાવો કર્યો છે કે અમેરિકાએ દેશની ધરતી પર શીખ અલગતાવાદી નેતા ગુરપતવંત સિંહ પન્નુની હત્યાના ષડયંત્રને નિષ્ફળ બનાવ્યું છે. અધિકારીના જણાવ્યા અનુસાર, અમેરિકન અધિકારીઓએ આ અંગે નવી દિલ્હી સમક્ષ ચિંતા વ્યક્ત કરી છે કે સંભવતઃ ભારત સરકારને આ ષડયંત્રની જાણ હોઈ શકે છે.

બ્રિટિશ મીડિયાના અહેવાલ પરના પ્રશ્નોના જવાબમાં વિદેશ મંત્રાલયના પ્રવક્તા અરિંદમ બાગચીએ કહ્યું, "ભારત-યુએસ સુરક્ષા સહયોગ પર તાજેતરની ચર્ચાઓ દરમિયાન, યુએસ પક્ષે સંગઠિત ગુનેગારો, બંદૂકના વેપારીઓ, આતંકવાદીઓ અને અન્યો વચ્ચેના જોડાણ અંગે ચર્ચા કરી હતી. સુરક્ષા સંબંધિત માહિતી બંને દેશો માટે ચિંતાનું કારણ છે અને તેઓએ જરૂરી પગલાં લેવાનો નિર્ણય કર્યો છે. તે માટે, ભારત આવી માહિતીને ગંભીરતાથી લે છે કારણ કે તે આપણા પોતાના રાષ્ટ્રીય સુરક્ષા હિતોને પણ અસર કરે છે.”

અમેરિકન અધિકારીના જણાવ્યા અનુસાર, ફેડરલ ઇન્વેસ્ટિગેશન એજન્સીઆ મામલાની તપાસ કરી રહી છે. એફબીઆઈ અને ન્યાય વિભાગના પ્રવક્તાએ બુધવારે આ કેસ પર ટિપ્પણી કરવાનો ઇનકાર કર્યો હતો. આ હત્યાના કાવતરાને નિષ્ફળ બનાવવાની જાણ સૌપ્રથમ ફાઈનાન્સિયલ ટાઈમ્સ દ્વારા કરવામાં આવી હતી, જેમાં કહેવામાં આવ્યું હતું કે યુએસએ તેના કેટલાક સહયોગીઓને કથિત કાવતરા અંગે જાણ કરી છે. યુએસ નેશનલ સિક્યોરિટી કાઉન્સિલના પ્રવક્તા એડ્રિન વોટસને એક નિવેદનમાં કહ્યું, 'અમે આ મુદ્દાને ખૂબ જ ગંભીરતાથી લઈ રહ્યા છીએ, અને યુએસ સરકારે તેને ભારત સરકાર સમક્ષ ઉઠાવ્યો છે. જૂન ૨૦૨૩માં કેનેડામાં ખાલિસ્તાની આતંકવાદી હરદીપ સિંહ નિજ્જરની હત્યા કરવામાં આવી હતી. કેનેડાએ ભારત પર તેના ષડયંત્રનો આરોપ લગાવ્યો હતો. પરંતુ ભારતે આ આરોપોને ફગાવી દીધા હતા.

ખાલિસ્તાની ગુરપતવંત સિંહ પન્નુનો જન્મ અમૃતસર જિલ્લાના ખાનકોટ ગામમાં થયો હતો. તેના પિતા પંજાબ સ્ટેટ એગ્રીકલ્ચર માર્કેટિંગ બોર્ડમાં હતા. પંજાબ યુનિવર્સિટી, ચંદીગઢમાંથી કાયદાની ડિગ્રી મેળવનાર પન્નુ કાનૂની પ્રવક્તા અને શીખ ફોર જસ્ટિસના પ્રવક્તા પણ છે. કેનેડા ઉપરાંત તેની પાસે અમેરિકન નાગરિકતા પણ છે. ભારત છોડીને વિદેશ ગયેલા પન્નુએ ત્યાં થોડો સમય ડ્રાઈવર તરીકે કામ કર્યું અને પછી કાયદાની પ્રેક્ટિસ શરૂ કરી. તેના હિંસક ઈરાદાઓ એ હકીકત પરથી સમજી શકાય છે કે જુલાઈ ૨૦૨૩ માં એક વીડિયો જાહેર કરીને તેણે ઉત્તર અમેરિકા અને યુરોપમાં ભારતીય રાજદ્વારીઓની હત્યાનું આહવાન કરતા પોસ્ટરોની જવાબદારી લીધી હતી. ભારત સરકારે વર્ષ ૨૦૨૦ માં પન્નુને આતંકવાદી જાહેર કર્યો હતો અને ગેરકાનૂની પ્રવૃત્તિઓ નિવારણ અધિનિયમ હેઠળ તેની ખેતીની જમીન જપ્ત કરી હતી.

ખાલિસ્તાની પન્નુ સામે ભારતમાં દેશદ્રોહના કેસ સહિત ૨૦ થી વધુ ફોજદારી કેસ નોંધાયેલા છે. પન્નુ ખાલિસ્તાનના સમર્થનમાં અમેરિકા અને કેનેડા જેવા દેશોમાં કાર્યક્રમો અને રેલીઓનું આયોજન કરી રહ્યો છે. તે ભારત પર શીખોના માનવાધિકારનું ઉલ્લંઘન કરવાનો આરોપ પણ લગાવી રહ્યો છે. ભારત ઇચ્છતું હતું કે તેની સામે આંતરરાષ્ટ્રીય સ્તરે રેડ કોર્નર નોટિસ જારી કરવામાં આવે, પરંતુ હાલમાં તેની સામે ઇન્ટરપોલ નોટિસ જારી કરવામાં આવી નથી. એસએજેએ શીખો માટે અલગ દેશ-ખાલિસ્તાનની માંગણી કરતું સંગઠન છે અને આતંકવાદી પન્નુ ૨૦૦૭માં સ્થાપિત આ સંગઠનના સ્થાપક સભ્યોમાંના એક છે.