યુપીના વારાણસીમાં વંદે ભારત એક્સપ્રેસ પર પથ્થરમારાની ઘટના પાછળ જે બાબતો સામે આવી છે તે અત્યંત ચોંકાવનારી છે. યુપી એટીએસની તપાસમાં સામે આવ્યું છે કે પથ્થરબાજોનો હેતુ માત્ર ટ્રેનની બારીઓ તોડીને ટ્રેનની સ્પીડ ધીમી કરવાનો હતો. આ બાબતે તપાસમાં મોટો ખુલાસો થયો છે.

બુધવારે વારાણસીથી દિલ્હી જતી વંદે ભારત એક્સપ્રેસ પર કાનપુરના પંકી સ્ટેશન પાસે પથ્થરમારાની ઘટના બની હતી. ટ્રેનના C7 કોચની બારીના કાચ તૂટી ગયા હતા અને ઘણા મુસાફરો ડરના માર્યા પોતાની સીટ પાસે બેસી ગયા હતા. આ બાબતની માહિતી આરપીએફ પંકી અને જીઆરપી કંટ્રોલ પ્રયાગરાજને આપવામાં આવી હતી. આ પછી અજાણ્યા વ્યક્તિઓ વિરુદ્ધ રેલવે સંપત્તિને નુકસાન પહોંચાડવાની કલમો હેઠળ કેસ નોંધવામાં આવ્યો હતો.

તપાસમાં થયો મોટો ખુલાસો

વારાણસીની ATS યુનિટે આ કેસની તપાસ શરૂ કરી અને આરોપી હુસૈન ઉર્ફે શાહિદની ધરપકડ કરી છે. પૂછપરછ દરમિયાન તેણે ખુલાસો કર્યો હતો કે પત્થર ફેંકવાનો અસલી હેતુ ટ્રેનની સ્પીડ ધીમી કરવાનો હતો, જેથી બારી પાસે બેઠેલા મુસાફરોના મોબાઈલ ફોન સરળતાથી છીનવી શકાય. આ ષડયંત્રથી સુરક્ષા એજન્સીઓ ચોંકી ઉઠી છે.

પ્રથમ ઘટના નથી

આ પહેલા પણ વંદે ભારત ટ્રેન પર પથ્થરમારાની ઘટનાઓ બની ચૂકી છે. કાનપુર ઉપરાંત ઈટાવામાં પણ આવી ઘટના સામે આવી હતી. આ ઘટનાઓએ રેલવે અને સુરક્ષા દળો માટે પડકાર ઉભો કર્યો છે.

ઘટના બાદ રેલવે પ્રશાસને સુરક્ષા વધારી દીધી છે અને વંદે ભારત એક્સપ્રેસના રૂટ પર વધારાની તકેદારી રાખવામાં આવી રહી છે. આરપીએફ અને જીઆરપીની સંયુક્ત ટીમ મુસાફરોની સુરક્ષા પર નજર રાખી રહી છે. પોલીસની પાંચ ટીમો આ કેસની તપાસ કરી રહી છે અને અન્ય આરોપીઓને પકડવાના પ્રયાસો ચાલુ છે. આ ષડયંત્રનો પર્દાફાશ થયા બાદ મુસાફરોની સુરક્ષાને લઈને વધુ કડક પગલાં લેવામાં આવી રહ્યા છે, જેથી આવી ઘટનાઓને રોકી શકાય.