ઈરાનના રાષ્ટ્રપતિ ઈબ્રાહિમ રાયસીનું હેલિકોપ્ટર દુર્ઘટનામાં મૃત્યુ થયું હતું. ત્યારે રાષ્ટ્રપતિની ચૂંટણી 28 જૂને યોજાવાની છે. રાષ્ટ્રપતિની ચૂંટણીમાં ભાગ લેવા માટે ઉમેદવારો નોંધણી કરાવી રહ્યા છે. પરંતુ શું ઈરાનમાં એવા નિયમો છે કે મહિલાઓને રાષ્ટ્રપતિ બનવા પર પ્રતિબંધ છે.

ઈરાનમાં 28 જૂને યોજાનારી રાષ્ટ્રપતિની ચૂંટણી માટે રજીસ્ટ્રેશન શરૂ થઈ ગયું છે. આ રજીસ્ટ્રેશન કરાવનાર  ઉમેદવારોમાં રાષ્ટ્રપતિ બનવાની રેસમાં ભૂતપૂર્વ મહિલા ધારાસભ્ય ઝોહર ઈલાહિયન પણ છે પરંતુ ચૂંટણી લડતા પહેલા જ તેમની પ્રમુખપદની ઉમેદવારી પુરી થઈ ગઈ હોવાનું માનવામાં આવે છે.

ઈલાહિયન ઈરાનની નાગરિક છે અને તેની ઉંમર 57 વર્ષ છે. આ સિવાય તે વ્યવસાયે ડોક્ટર પણ છે. રાજકારણમાં આવ્યા બાદ તેઓ બે વખત સંસદમાં ચૂંટાયા છે. આ સિવાય તે સંસદની રાષ્ટ્રીય સુરક્ષા અને વિદેશ નીતિ સમિતિના સભ્ય પણ રહી ચૂક્યા છે. પરંતુ તેમ છતાં કહેવામાં આવી રહ્યું છે કે તેમના માટે રાષ્ટ્રપતિ બનવું મુશ્કેલ છે.

ઉમેદવારોને મંજૂરી કોણ આપે છે?

ઈરાનમાં પ્રમુખપદની ચૂંટણી લડી રહેલા ઉમેદવારોના નામ કોણ મંજૂર કરે છે? ગાર્ડિયન કાઉન્સિલ ઈરાનમાં ચૂંટણી અને કાયદાની દેખરેખ રાખે છે. આ 12 સભ્યોની ન્યાયશાસ્ત્રીઓની કાઉન્સિલ છે, જેના સભ્યોની નિમણૂક અથવા તો સર્વોચ્ચ નેતા દ્વારા મંજૂરી આપવામાં આવે છે. ગાર્ડિયન કાઉન્સિલ પાંચ દિવસના રજીસ્ટ્રેશન સમયગાળા પછી પ્રમુખપદ માટે અરજી કરનારા ઉમેદવારોની ચકાસણી કરશે.