​​​​​​​ભારતના વડાપ્રધાન નરેન્દ્ર મોદી હાલમાં રશિયાના બે દિવસીય પ્રવાસ પર છે. PM મોદી સોમવારે સાંજે રશિયાના મોસ્કો શહેરમાં પહોંચ્યા હતા. મોસ્કોમાં પીએમ મોદીનું ભવ્ય સ્વાગત કરવામાં આવ્યું હતું. રશિયાના રાષ્ટ્રપતિ વ્લાદિમીર પુતિને મોદીનું તેમના સત્તાવાર નિવાસસ્થાને ઉષ્માભર્યું સ્વાગત કર્યું હતું. મોદી જ્યારે પુતિનના સત્તાવાર આવાસ પર પહોંચ્યા ત્યારે પુતિન ત્યાં પહેલેથી જ ઉભા હતા. ભારતીય વડા પ્રધાન તેમની કારમાંથી બહાર આવ્યા કે તરત જ પુતિન આગળ આવ્યા અને હાથ મિલાવ્યા અને ગળે મળીને મિત્રતા વ્યક્ત કરી હતી. આ દરમિયાન ત્યાં હાજર એક મહિલાએ લોકોનું ધ્યાન પોતાની તરફ ખેંચ્યું હતું. ઘણા લોકો જાણવા માંગે છે કે તે મહિલા કોણ હતી જે પીએમ મોદી અને વ્લાદિમીર પુતિન સાથે જોવા મળી હતી.

એવું કહેવાય છે કે પીએમ મોદી અને વ્લાદિમીર પુતિન બંને પોતાની માતૃભાષામાં બોલવાનું પસંદ કરે છે. સોમવારે સાંજે ડિનર દરમિયાન પણ પુતિન તેમની માતૃભાષામાં વાત કરતા જોવા મળ્યા હતા તો બીજી તરફ મોદી પણ પુતિન સાથે હિન્દીમાં વાત કરી રહ્યા હતા. બંને દેશોના રાષ્ટ્રાધ્યક્ષોને એકબીજાને સમજાવવા માટે અનુવાદકો રાખવામાં આવ્યા હતા. આ મહિલા પણ તેમાંથી એક હતી.

આ મહિલાને રશિયાએ હાયર કરી હતી. જે હિન્દીમાં પુતિનની વાતો કહી રહી હતી. પીએમ મોદીની મીટિંગ દરમિયાન આ મહિલા ઉપરાંત અનુવાદકો પણ રાખવામાં આવ્યા હતા.  કેટલાક અનુવાદકો ભારતના પણ હતા. પુતિનના ઘરે મોદી સાથેની અનૌપચારિક મુલાકાત દરમિયાન તેમણે મોદીના ભરપૂર વખાણ કર્યા હતા. પુતિને તેમને સતત ત્રીજી વખત વડાપ્રધાન બનવા પર પણ અભિનંદન પાઠવ્યા હતા. આ દરમિયાન પુતિને કહ્યું કે તમારા દ્વારા કરવામાં આવેલા કામનું પરિણામ છે કે તમે ત્રીજી વખત વડાપ્રધાન બન્યા છો.