રાજકોટ મહાપાલિકામાં આગામી તા.૨૦મીએ જનરલ બોર્ડ મિટિંગ મળનારી છે તે પૂર્વે જ સેક્રેટરી કોણ ? તે ચર્ચાએ જોર પકડું છે. એચ.પી.પારેલીયા સૌરાષ્ટ્ર્ર યુનિવર્સીટીમાંથી મહાપાલિકામાં હાજર થઇ ગયાને એક મહીનાથી વધુ સમય થઇ ગયો હોવા છતાં આજ દિવસ સુધી તેમની ચેમ્બર બહાર નેઇમ પ્લેટ પણ લગાવવામાં આવી છે જે બાબત સૂચક અને અનેક નિર્દેશ આપનારી છે, આવું જવલ્લે જ બનતું હોય છે. મહાપાલિકામાં અધિકારી કે પદાધિકારી ચાર્જ સંભાળે તેની ગણતરીની કલાકોમાં નેઇમ પ્લેટ બદલાતી હોય છે.

સૌરાષ્ટ્ર્ર યુનિવર્સીટીમાંથી પારેલીયા પરત ફર્યા પછી હજુ તેમને સત્તાવાર રીતે કામગીરીની સોંપણી પણ થઇ ન હોય સ્ટેન્ડિંગ કમિટીની મિટિંગમાં ઇન્ચાર્જ સેક્રેટરી તરીકે ડેપ્યુટી સેક્રેટરી કમ પી.એ. ટુ સ્ટેન્ડિંગ કમિટિ ચેરમેન ધવલભાઇ જેસડીયાએ કાર્યભાર સંભાળ્યો હતો, આગામી તા.૨૦મીએ જનરલ બોર્ડ મિટિંગ મળનારી છે તેમાં પણ સંભવત: જેસડીયા જ કામગીરી સંભાળે તેવી શકયતા છે.  દરમિયાન યુનિ.માંથી પરત ફર્યા બાદ થોડા દિવસ નિયમિત કચેરીએ આવ્યા બાદ હાલ પારેલીયા રજા ઉપર ઉતરી ગયા હોવાનું જાણવા મળે છે, તેમની ચેમ્બર બધં છે અને ફોન પણ નો રીપ્લાય થઇ રહ્યો હોય તર્ક વિતર્કેા સર્જાઇ રહ્યા છે.

મામલો રાજકીય કે અધિકારીક?

યુનિવર્સીટીમાંથી રજિસ્ટ્રાર પદેથી રાજીનામુ આપીને મહાપાલિકામાં પરત ફર્યા બાદ આજ દિવસ સુધી પારેલીયાને તેમની સેક્રેટરી તરીકેની મૂળ કામગીરી પરત સોંપવામાં આવી ન હોય આ મામલે પણ ભારે ચર્ચા જાગી છે. ખરેખર આ મામલો રાજકીય બન્યો છે કે પછી અધિકારીક સ્તરેથી કોઈ મુશ્કેલી સર્જાઇ છે તે મામલે ઉચ્ચ અધિકારીઓ કે પદાધિકારીઓએ હજુ સુધી મગનું નામ મરી પાડું નથી પરંતુ કંઇક રંધાઇ રહ્યું છે.