​​​​​​​પેન્સિલવેનિયામાં રવિવારે ચૂંટણી રેલી દરમિયાન ભૂતપૂર્વ રાષ્ટ્રપતિ ડોનાલ્ડ ટ્રમ્પ પર હુમલો કરનાર હુમલાખોર થોમસ મેથ્યુ ક્રૂક્સનો ફોટો સામે આવ્યો છે. ટ્રમ્પને ગોળી માર્યાની થોડી જ સેકન્ડો પછી સિક્રેટ સર્વિસે હુમલાખોરને માથામાં ગોળી મારીને મારી નાખ્યો. હવે ફેડરલ બ્યુરો ઓફ ઇન્વેસ્ટિગેશન (FBI) એ થોમસનો ફોટો જાહેર કર્યો છે.

એજન્સીએ કહ્યું કે થોમસ ખૂબ જ શાંત વ્યક્તિ હતો. તે એકલો રહેતો હતો અને 2022માં બેથેલ પાર્ક હાઈસ્કૂલમાંથી સ્નાતક થયો હતો. થોમસને નેશનલ મેથેમેટિક્સ એન્ડ સાયન્સ ઇનિશિયેટિવ તરફથી $500 સ્ટાર એવોર્ડ પણ મળ્યો હોવાનું કહેવાય છે. તે રજિસ્ટર્ડ રિપબ્લિકન હતો અને આગામી નવેમ્બર 5 ની રાષ્ટ્રપતિની ચૂંટણીમાં પ્રથમ વખત મતદાર હતો.

શાળામાં મળતી હતી ધમકીઓ

થોમસના શાળાના સાથીએ કહ્યું કે તેણે તેને ક્યારેય રાજકારણ અથવા ટ્રમ્પ પર ચર્ચા કરતા જોયો નથી. પરંતુ  તેની સાથે ઘણી વાર શાળામાં દાદાગીરી કરવામાં આવતી હતી. એક વિદ્યાર્થીએ અમેરિકન મીડિયાને જણાવ્યું કે તે શાંત રહેતો હતો પરંતુ તેને ધમકાવવામાં આવતો હતો. તેની સાથે ખૂબ જ દાદાગીરી કરવામાં આવી હતી.

સ્નાતક થયા પછી તે નર્સિંગ હોમમાં કામ કરતો હતો. હુમલા બાદ, તેની કારની અંદરથી એક 'શંકાસ્પદ ઉપકરણ' મળી આવ્યું હતું. જે હવે બોમ્બ ટેકનિશિયન દ્વારા તપાસવામાં આવી રહ્યું છે. અધિકારીઓ હવે તેનો ફોન પણ ચેક કરી રહ્યા છે.

સુરક્ષા અધિકારીઓને આપવામાં આવી હતી ચેતવણી

હુમલા પહેલા રેલીમાં હાજર રહેલા પ્રત્યક્ષદર્શીઓએ દાવો કર્યો હતો કે તેઓએ સુરક્ષા અધિકારીઓને એક વ્યક્તિ વિશે ચેતવણી આપવાનો પ્રયાસ કર્યો હતો. જે નજીકની ઈમારતની છત પર ચાલી રહ્યો હતો અને રેલી તરફ ઈશારો કરતી બંદૂક સાથે ત્યાં હાજર હતો.