બોલીવુડની પ્રખ્યાત અભિનેત્રી વિદ્યા બાલન AI જનરેટ કરેલા વીડિયોને કારણે ચિંતિત છે. તે કહે છે કે AI વડે બનાવેલા તેના કેટલાક વીડિયો વાયરલ થઈ રહ્યા છે અને તે બનાવવામાં તેનો કોઈ હાથ નથી. તેમણે પોતાના ચાહકોને આવા વીડિયોથી સાવધાન રહેવા પણ કહ્યું છે.

વિદ્યાએ ઇન્સ્ટાગ્રામ પર એક વીડિયો પોસ્ટ કર્યો છે. જે એક AI વીડિયો છે. વીડિયોની ઉપર લખ્યું છે, 'સ્કેમ એલર્ટ'. વિદ્યાએ એક નોટ પણ શેર કરી. જેમાં તેણે લખ્યું, “વોટ્સએપ અને સોશિયલ મીડિયા પર ઘણા વીડિયો ફરતા થઈ રહ્યા છે. હું સ્પષ્ટ કરવા માંગુ છું કે તે વીડિયો AI દ્વારા જનરેટેડ અને નકલી છે.

વિદ્યાએ આગળ લખ્યું કે આવા વીડિયો બનાવવા અને ફેલાવવામાં મારી કોઈ ભૂમિકા નથી. હું આવી સામગ્રીને કોઈપણ રીતે સમર્થન આપતી નથી. વિડિઓમાં જે પણ દાવા કરવામાં આવી રહ્યા છે તે મારા નથી. કારણકે આવા વિડિઓ મારા મંતવ્યો અને કાર્યને પ્રતિબિંબિત નથી કરતા. હું દરેકને વિનંતી કરું છું કે કંઈપણ શેર કરતા પહેલા ચકાસણી કરે અને આવી AI સામગ્રીથી સાવધ રહે.

આ પહેલી વાર નથી જ્યારે કોઈ કલાકાર AI વિશે ચિંતિત હોય. દરરોજ, કોઈને કોઈ સ્ટારના AI ફોટા સોશિયલ મીડિયા પર વાયરલ થાય છે. વિદ્યાએ ચાહકોને ચેતવણી આપવા માટે પોસ્ટ કરેલો વીડિયો જોઈને આ વીડિયો અસલી છે કે નકલી તે ઓળખવું ખૂબ મુશ્કેલ છે.