વલ્લભીપુરના બે શખ્સોએ  વાહન ખરીદવા માટે બોટાદની ફાઈનાન્સ કંપનીમાંથી અનુક્રમે ચાર અને પાંચ લાખની લોન લીધા બાદ આપેલા ચેક બેન્કમાંથી પરત ફર્યાના કેસમાં બોટાદ કોર્ટે ચુકાદો આપી બન્ને શખ્સને એક-એક વર્ષની સાદી કેદની સજા અને ચેકની દોઢી રકમનો દંડ ફટકાર્યો હતો.
વલ્લભીપુરમાં ગ્રામ પંચાયત મંદિર  નજીક રહેતો નરેન્દ્ર બાબુભાઈ ડાબસરા નામના શખ્સે બોટાદ સ્થિત શ્રીરામ ટ્રાન્સપોર્ટ ફાઈનાન્સ કંપનીમાંથી આઈસર વાહન ખરીદી માટે ચાર લાખની લોન લીધી હતી. જે લોનની બાકી લેણાંની રકમ ૨.૧૦ લાખ રૂપીપાનો શખ્સે ચેક આપતા પુરતા નાણાં ભંડોળના અભાવે ચેક પરત ફર્યો હતો. જેથી કંપનીના કલેક્શન મેનેજર ગીરવાનસિંહ રાઠોડે બોટાદના ત્રીજા એડીશનલ જ્યુડીશિયલ મેજિસ્ટ્રેટ ફર્સ્ટ  ક્લાસની કોર્ટમાં ફરિયાદ સાથે રજૂ થયેલા આધાર-પુરાવાને ગ્રાહ્ય રાખી ન્યાયમૂર્તિ એચ.એચ. પટેલે નરેન્દ્ર ડાબસરાને કસુરવાન ઠેરવી  એક વર્ષ સાદીની કેદ, ચેકની દોઢી રકમનો દંડ અને જો દંડ ન ભરે તો વધુ ત્રણ માસની સજાનો હુકમ કર્યો હતો.  જ્યારે બીજા અન્ય કેસમાં વલ્લભીપુરની મુખ્ય બજાર, મુસાભાઈ શેરીમાં રહેતો આબિદ એમ. મામાણી નામના શખ્સે શ્રીરામ ટ્રાન્સપોર્ટ ફાઈનાન્સ કંપનીમાંથી વાહન ખરીદવા માટે પાંચ લાખની લોન લીધા બાદ તે રકમનો આપેલો ચેક પરત ફર્યો હતો. જે અંગે બોટાદના ત્રીજા એડીશનલ જ્યુડીશિયલ મેજિસ્ટ્રેટ ફર્સ્ટ ક્લાસની કોર્ટમાં શખ્સ સામે થયેલી ફરિયાદની સુનવણી બાદ ફરિયાદ સાથે  રજૂ કરેલા આધાર-પુરાવાને ધ્યાને લઈ ન્યાયમૂર્તિ એચ.એચ. પટેલે આબિદ મામાણીને એક વર્ષ સાદી કેદની સજા, ચેકની દોઢી રકમનો દંડ, જો દંડ ન ભરે તો વધુ ત્રણ માસની સજા ફરમાવી હતી. આ બન્ને કેસમાં દંડની રકમમાંથી ચેકની રકમ ફરિયાદીને ચુકવવા હુકમ કરાયો હતો.