પોરબંદરના સમુદ્રમાં કોસ્ટગાર્ડનું હેલીકોપ્ટર ક્રેશ થવાના બનાવમાં ગઇ કાલે મોડી સાંજે બે કોસ્ટગાર્ડ જવાનના મૃતદેહ મળી આવતા પોરબંદર લવાયા બાદ જેટી ખાતેથી સીધા જ જામનગર લઇ જવાયા છે તેમજ તેનો કેટલોક કાટમાળ પણ મળી આવ્યો હતો જેને શીપમાં લાવવામાં આવ્યો હતો તથા એક ઇજાગ્રસ્ત જવાનને પણ લવાયો હતો.
બનાવની વિગત એવી છે કે પરમદિવસે મોડી રાત્રે ૧૧ વાગ્યાના સુમારે ભારતીય કોસ્ટગાર્ડને એવી માહિતી મળી હતી કે પોરબંદરથી ૧૦૦ કિ.મી. દૂર સમુદ્રમાં મોટર ટેન્કર (જહાજ) ‘હરિલીલા’માં એક ક્રૂ મેમ્બર ગંભીર રીતે ઇજાગ્રસ્ત થયો હતો આથી તેને બચાવવા માટે ઇન્ડીયન કોસ્ટગાર્ડનું એ.એલ.એચ. હેલિકોપ્ટર રવાના કરવામાં આવ્યુ હતુ અને આ ઓપરેશન દરમિયાન હેલિકોપ્ટર જહાજ સુધી પહોંચે તે પહેલા જ તેને ઇમરજન્સી લેન્ડીંગ કરવાની સમુદ્રમાં જ ફરજ પડી હતી તેથી હેલીકોપ્ટર સાથે ચાર જેટલા કોસ્ટગાર્ડ જવાનો સમુદ્રમાં પડી ગયા હતા તે પૈકી એક જવાનનો બચાવ થયો છે 
પોરબંદરથી ૧૦૦ કિ.મી. દૂર દરિયામાં કોસ્ટગાર્ડનું હેલીકોપ્ટર મેડિકલ ઇમરજન્સી માટે ગયુ ત્યારે ક્રેશ થયાના બનાવમાં આ હેલીકોપ્ટરમાં રહેલા ચાર જવાનો પૈકી એક જે તે સમયે બચી ગયો હતો જેને પોરબંદર લાવવામાં આવ્યો હતો જ્યારે બીજા ત્રણની શોધખોળ હાથ ધરવામાં આવતા તે પૈકી બે કોસ્ટગાર્ડ જવાનના મૃતદેહ મળી આવ્યા હતા જ્યારે એક કર્મચારી હજુ લાપતા છે.
 બંને મૃતદેહને પોરબંદર કોસ્ટગાર્ડની જેટી ખાતે મોડી સાંજે લવાયા બાદ સીધા જ જામનગર લઇ જવાયા હતા તે ઉપરાંત દરિયામાં ક્રેશ થયેલ કોસ્ટગાર્ડના હેલીકોપ્ટરનો કેટલોક કાટમાળ પણ બહાર કાઢીને શીપ મારફતે પોરબંદર લાવવામાં આવ્યો હતો.