ચીનના જિયાંગસુ પ્રાંતમાં કોરિયન ફિલ્મ પેરેસાઈટ જેવી ઘટના વાસ્તવમાં બની છે. જેમાં જિયાંગસુ પ્રાંતમાં રહેતા લીને તાજેતરમાં જ એવા ચોંકાવનારા સત્યનો સામનો કરવો પડ્યો હતો. ઘરની સફાઈ કરતી વખતે તેમને સીડીની પાછળ એક ગુપ્ત દરવાજો મળ્યો. દરવાજો ખોલતાં એક સંપૂર્ણ સજ્જ ભોંયરું દેખાયું, જેમાં લાઇટિંગ, વેન્ટિલેશન સિસ્ટમ અને એક નાનો બાર પણ હતો. વધુ આંચકો તો ત્યારે લાગ્યો જ્યારે તેઓને ખબર પડી કે એ જગ્યા ખાલી નથી, પણ થોડા સમય પહેલા સુધી ત્યાં કોઈ રહેતું હતું!
તપાસ કરી ત્યારે લીને જાણવા મળ્યું કે તેની વૃદ્ધ મકાનમાલિક ઝાંગ કોઈને પણ ખ્યાલ ન આવે એ રીતે છેલ્લા સાત વર્ષથી આ ભોંયરામાં રહેતી હતી અને લીએ ઝાંગનો સંપર્ક કર્યો અને તેના પર ઘર વેચતી વખતે જાણી જોઇને આ બેઝમેન્ટની માહિતી ન આપવાનો તેના પર આરોપ લગાવ્યો પરંતુ ઝાંગનો જવાબ આશ્ચર્યજનક હતો. તેણે કહ્યું કે મેં ઘર વેચ્યું હતું પરંતુ બેઝમેન્ટ ડીલમાં સામેલ નહોતું. જેથી હું થોડો આરામ કરવા મારા ઘરે આવી-જઈ શકું! પણ હજી સુધી તે સ્પષ્ટ નથી થયું કે ઝાંગ ઘરની અંદર આવ-જાવ કઈ રીતે કરતી હતી. સોશિયલ મીડિયા પર વાયરલ થયેલા કેસમાં કેટલાક કહે છે કે બેઝમેન્ટમાં જવાનો ગુપ્ત માર્ગ પાર્કિંગ ગેરેજ સાથે જોડાયેલ હતો, જ્યારે કેટલાક દાવો કરે છે કે ઝાંગ પાસે ઘરની વધારાની ચાવી હતી. જોકે, મામલો કોર્ટમાં પહોંચ્યા બાદ લી માત્ર બેઝમેન્ટના માલિક જ ન બન્યા પરંતુ તેમને ઝાંગ પાસેથી વળતર પણ મેળવ્યું. આ કેસની સરખામણી ઓસ્કાર વિજેતા ફિલ્મ પેરાસાઇટ સાથે કરવામાં આવી રહી છે, જેમાં એક માણસ વર્ષો સુધી ભોંયરામાં છુપાયેલો રહે છે.