રાજકોટ સહિત રાજ્યમાં અનેક વિસ્તારોમાં અને તેમાં પણ ખાસ કરીને દરિયાકાંઠાના વિસ્તારોમાં વેસ્ટરન ડિસ્ટર્બન્સ ની અસરના ભાગરૂપે સવારે વાતાવરણમાં ભેજનું પ્રમાણ એકાએક જોરદાર રીતે વધી ગયું હતું. પવનની દિશા પણ બદલાઈ હતી અને તેના કારણે સવારે ઠંડો પવન ફૂકાયો હતો. આ પ્રકારના આહલાદક વાતાવરણના કારણે સવારે ગરમીમાં રાહત રહી હતી. દિવસ દરમિયાન પણ મહત્તમ તાપમાનમાં સામાન્ય ઘટાડો નોંધાયો છે અને આગામી ત્રણ દિવસમાં મહત્તમ તથા લઘુતમ તાપમાન 3 થી 4 ડીગ્રી જેટલું નીચે ઉતરશે તેવી આગાહી હવામાન વિભાગે કરી છે.

આજે સવારે ભુજમાં 83 દ્વારકામાં 78 કંડલામાં 84 નલિયામાં 80 ઓખામાં 76 પોરબંદરમાં 78 રાજકોટમાં 83 સુરતમાં 90 વેરાવળમાં 78 દમણમાં 82 દીવમાં 77% ભેજ નોંધાયો છે.

હવામાન વિભાગના જણાવ્યા મુજબ સૌરાષ્ટ્રમાં માત્ર રાજકોટ સુરેન્દ્રનગર અને અમરેલીમાં જ મહત્તમ તાપમાન 40 ડિગ્રી થી વધુ નોંધાયું છે. તે સિવાય કચ્છ સહિત સર્વત્ર ૪૦ ડિગ્રી થી ઓછું તાપમાન રહ્યું છે. રાજકોટમાં ગઈકાલે 40.7 અમરેલીમાં 40.3 અને સુરેન્દ્રનગરમાં 40.8 ડીગ્રી મહત્તમ તાપમાન નોંધાયું હતું. ભાવનગરમાં 38.7 ભુજમાં 38.4 દ્વારકામાં 28.6 જામનગરમાં 34.5 કંડલામાં 37 નલિયામાં 33.2 ઓખામાં 31.2 પોરબંદરમાં 36.2 અને વેરાવળમાં 35 ડિગ્રી મહત્તમ તાપમાન ગઈકાલે નોંધાયું છે.

વેસ્ટર્ન ડિસ્ટર્બન્સ ની અસર ના ભાગરૂપે જમ્મુ કશ્મીર લદાખ સહિતના વિસ્તારોમાં ભારે વરસાદ પડી રહ્યો છે. પંજાબમાં પણ વરસાદ માટે આગાહી કરવામાં આવી છે. આસામમાં સાયકલોનિકલ સર્ક્યુલેશન છવાયું છે અને તેના કારણે આસામ અરુણાચલ સહિતના નોર્થ ઈસ્ટ ના રાજ્યોમાં પણ વરસાદની આગાહી કરવામાં આવી છે.