શહેર અને ગ્રામ્ય પંથકમાં દેશી દારૂનું દુષણ વકરી રહ્યુ છે. ત્યારે છેલ્લા લાંબા સમયથી દેશી દારૂની ગાડીઓમાં હેરાફેરી થતી હોવાને લઈ હાથબ ગામના લોકોએ પોલીસનું કામ જાતે કરી જનતા રેડ કરી હતી. દારૂનો જથ્થો ભરી પસાર થતી સ્વિફટ કારને પકડી પાડતા તેમાંથી દેશી દારૂની પોટલીઓ મળી આવી હતી. જેને લઈ લોકોએ પોલીસ કંટ્રોલને ફોન કરી મોરચંદ ગામના ચાલકને પોલીસને સોપ્યો હતો.
ઘોઘાના ગ્રામ્ય પંથકમાં દેશી દારૂની ધગતી ભઠીઓ ધમધમતી જોવા મળી રહી છે. શહેર અને જિલ્લામાં દેશી દારૂનું ખુલ્લેઆમ વેંચાણ થઈ રહ્યુ છે. ત્યારે ઘોથા પંથકની પ્રજાએ દારૂનું દુષણ બંધ કરાવવા અને દારૂની હેરાફેરી થતી રોકવા રજુઆતો કરી હતી. પરંતુ આખરે હાથબ ગામના લોકોએ સ્વયમ રેડ કરી હતી. ગાડીઓમાં થતી દેશી દારૂની હેરાફેરીને લઈ ગ્રામજનોએ  એકઠા થઈ આજે સવારે સ્વિફટ કાર નંબર જીજે. ૦૧. એચવી- ૮૬૨૫ને રોકી હતી. કારની તલાશી લેતા તેમાંથી દેશી દારૂની કોથળીઓ ભરેલા છ કોથળા મળી આવતા ભાવનગર પોલીસ કંટ્રોલને જાણ કરી હતી. દરમિયાન પેટ્રોલીંગમાં રહેલી ઘોઘા પોલીસને પણ બાતમી મળી હતી મોરચંદ ગામે રહેતો  ઘનશ્યામસિંહ ઉર્ફે દોલુભા કિરીટસિંહ  ગોહિલ તેના કબજા ભોગવટાની  કારમાં દેશી દારૂનો જથ્થો ભરી  નિકળનાર છે. જેને લઈ તપાસમાં હતી તે દરમિયાન કંટ્રોલરૂમથી વર્ધી મળી હતી. હાથબ ગામે પરબના નાળા પાસે લોકોએ દેશી દારૂ ભરેલી કાર સાથે શખસને પકડી લીધો હતો. જ્યારે ઘોઘા પોલીસે પહોંચી ૧૫૦ લીટર દેશી દારૂ, સ્વિફટ કાર સાથે ઘનશ્યામસિંહ ઉર્ફે દોલુભા કિરીટસિંહ ગોહીલની અટક કરી લઈ તેના વિરુધ્ધ ઘોઘા પોલીસે પ્રોહિબીશન એક્ટ હેઠળ  ગુનો દાખલ કરી આગળની તજવીજ હાથ ધરી હતી.