હેલ્મેટ સહિતના ટ્રાફિક નિયમના પાલન માટે અમદાવાદ પોલીસ એક્ટિવ બની છે. રાજકોટના વતની અને અમદાવાદમાં અભ્યાસ સહિતના કારણોસર રહેતા વિધાર્થીઓ સહિતના લોકો જો હેલ્મેટ પહેર્યા વગર ત્રણથી વધુ વખત નીકળશે અથવા તો વારંવાર ટ્રાફિક નિયમનો ભંગ કરશે તો તેમના લાયસન્સ રાજકોટ આરટીઓ સસ્પેન્ડ કરી શકે છે. અમદાવાદમાં ત્રણથી વધુ વખત હેલ્મેટ પહેર્યા વગર પકડાયેલા 58 લોકોનું લિસ્ટ ટ્રાફિક પોલીસે તૈયાર કરી રાજકોટ આઈટીઓને મોકલ્યું છે અને આ તમામના લાયસન્સ સસ્પેન્ડ કરવા જણાવાયું છે. જેને લઈને આરટીઓ દ્વારા 58 વ્યક્તિઓને નોટિસ ફટકારી છે અને ખુલાસાઓ માંગવામાં આવ્યા છે. યોગ્ય સમયે ખુલાસાઓ આપવામાં નહીં આવે તો આરટીઓ દ્વારા લાયસન્સ સસ્પેન્ડ કરવાની કાર્યવાહી કરવામાં આવશે. પકડાયેલા લોકોમાં મોટાભાગે વિધાર્થી બાબુડિયા હોવાનું જાણવા મળ્યું છે.

અમદાવાદમાં ટ્રાફિક નિયમનું કડક પાલન કરવા પોલીસે નવો પ્લાન ઘડ્યો છે. અમદાવાદના રહેવાસીઓ સામે તો હેલ્મેટ અને ટ્રાફિકના નિયમભંગ બદલ દંડનીય સહિતની કાર્યવાહી કરવામાં આવી રહી છે પરંતુ અન્ય જિલ્લાના અને અમદાવાદમાં રહેતા લોકો જો વારંવાર હેલમેટ વગર કે ટ્રાફિક નિયમનું ઉલ્લઘન કરતા પકડાય તો એવા વાહન ચાલકોની યાદી તૈયાર કરી જે-તે જિલ્લા તાલુકાના આરટીઓમાં મોકલી આપવામાં આવી રહી છે. અને આવા વાહન ચાલકોના લાયસન્સ સસ્પેન્ડ કરવા સુધીની કાર્યવાહી માટે સૂચના આપવામાં આવી છે.

ત્યારે અમદાવાદ ટ્રાફિક ડીસીપી સફિન હસન દ્વારા રાજકોટ આરટીઓ કચેરીને 58 જેટલા વાહન ચાલકોનું લિસ્ટ મોકલ્યું છે અને આ તમામ ચાલકો ત્રણથી વધુ વખત હેલમેટ પહેર્યા વગર પોલીસની ઝપટે ચડ્યા છે. આ લીસ્ટના આધારે રાજકોટ આરટીઓ કે.એમ.ખપેડ દ્વારા વાહન ચાલકોના રજીસ્ટ્રેશન દરમિયાનના એડ્રેસ પર નોટિસની બજવણી કરવામાં આવી છે. અને દિવસ 15માં ખુલાસો આપવા જણાવ્યું છે. જો ખુલાસો આપવામાં નહીં આવે કે કોઈ જવાબ નહીં અપાઈ તો તેમના લાયસન્સ સસ્પેન્ડ કરવામાં આવનાર છે.