ગોંડલમાં ભગવતપરામાં રહેતા શીદી યુવાનના ઘરે ધસી આવી બે શખસોએ તારો ભત્રીજો કયાં છે તેને મારવો છે તેમ કહી ઝઘડો કર્યો હતો.બાદમાં તેણે પોલીસ ફરજ બજાવતા પોતાના મિત્રને બોલાવી યુવાનને મારમારી જ્ઞાતિ અંગે અપમાનિત કર્યો હતો.સાથોસાથ કહ્યું હતું કે,સવાર સુધીમાં તારા ભત્રીજાને મોકલી આપજે નહીંતર જાનથી મારી નાખીશ.આ અંગે યુવાનની ફરિયાદ પરથી ગોંડલ સિટી પોલીસે છ સામે એટ્રોસિટી એકટ સહિતની કલમ હેઠળ ગુનો નોંધી જરૂરી કાર્યવાહી કરી હતી.
બનાવની જાણવા મળતી વિગતો મુજબ,ગોંડલના ભગવતપરમાં રહેતા અને માર્કેટીંગ યાર્ડમાં મજુરીકામ કરનાર પરવેઝ સલીમભાઇ મુળીયા(ઉ.વ ૨૮) નામના યુવાને નોંધાવેલી પોલીસ ફરિયાદમાં આરોપી તરીકે ઇમરાન ઉર્ફે ઇમલો કટારીયા,આદીલ ફકીર,સમુ ખાટકી,ઇમરાન ઉર્ફે ઇમલાનો ભાઇ સલીમ ઉર્ફે બેરો,પોલીસમાં ફરજ બજાવતો કાલુ ખીમસુરીયા અને મીત ખીમસુરીયા તથા બે અજાણ્યા શખસોના નામ આપ્યા છે.
​​​​​​​
યુવાને પોતાની ફરિયાદમાં જણાવ્યું હતું કે,આરોપી ઇમરાન ઉર્ફે ઇમલા સાથે તેના કૌટુંબિક ભત્રીજા રીયાકતને ટાપલી મારી બાદમાં તેને મારમારી ધમકી આપી હતી.જેથી ભત્રીજો ડરના લીધે રાજકોટ ચાલ્યો ગયો હતો.દરમિયાન રાત્રીના ઇમરાન અને આદીલ યુવાનના ધરે આવ્યા હતાં.બાદમાં કહ્યું હતું કે તારો ભત્રીજો રીયાકત કયાં છે જેથી યુવાને ભત્રીજો કયાં છે તેની મને ખબર નથી તેમ કહેતા આ શખસોએ તેની સાથે ઝઘડો કરી ગાળો આપી હતી.દરમિયાન અહીં લોકો એકત્ર થઇ જતા ઇમરાને પોલીસમાં ફરજ બજાવતા તેના મિત્ર કાલુ ખીમસુરીયાને બોલાવ્યો હતો.
બાદમાં કાલુ ખીમસુરીયા તેની સાથેના મિત સહિતનાએ તારો ભત્રીજો કયાં છે? તેમ કહી ઝઘડો કરી યુવાનને ઢીકાપાટુનો મારમારી ધમકી આપી હતી.દરમિયાન યુવાનના સમાજના લોકો તેને છોડવવા વચ્ચે પડતા આ શખસોએ ઉશ્કેરાઇ યુવાનને જ્ઞાતિ અંગે અપમાનજનક શબ્દો કહી સવાર સુધીમાં તારા ભત્રીજાને અમારી પાસે મોકલી દેજે નહીંતર જીવતો નહીં મુકીએ તેવી ધમકી આપી જતા રહ્યા હતાં.આ અંગે યુવાનની ફરિયાદ પરથી ગોંડલ પોલીસે આરોપીઓ સામે આઇપીસીની કલમ ૩૨૩, ૫૦૪,૫૦૬(૨) અને એટ્રોસિટી એકટની કલમ હેઠળ ગુનો નોંધી જરૂરી કાર્યવાહી કરી હતી.