ભારતીય સમય મુજબ મોડી રાત્રે દક્ષિણ કેલિફોર્નિયામાં 5.2ની તીવ્રતાનો ભૂકંપ આવ્યો હતો, જેના કારણે સાન ડિએગોમાં પહાડ પરથી ખડકો નીચે પડી ગયા અને રસ્તાઓ પર આવ્યા હતા. ઘરોના કબાટમાં રાખેલી વસ્તુઓ પડવા લાગી હતી. અધિકારીઓએ જણાવ્યું હતું કે, ભૂકંપને કારણે જાનમાલના નુકસાનના કોઈ અહેવાલ નથી. યુએસ જીઓલોજિકલ સર્વે (યુએસજીએસ) અનુસાર, ભૂકંપ સ્થાનિક સમય મુજબ સવારે 10:08 વાગ્યે આવ્યો હતો અને તેનું કેન્દ્રબિંદુ સાન ડિએગો કાઉન્ટીમાં હતું, જે જુલિયનથી માત્ર થોડા માઇલ (4 કિલોમીટર) દૂર છે. જુલિયન લગભગ 1,500 લોકોનું પર્વતીય શહેર છે, જે તેની સફરજન પાઇની દુકાનો માટે જાણીતું છે.

ઉત્તર પશ્ચિમમાં સ્ટેટ રૂટ 76 પર પર્વતો પરથી પથ્થરો પણ નીચે આવી ગયા

તેની અસરો લગભગ ૧૨૦ માઇલ (૧૯૩ કિલોમીટર) દૂર લોસ એન્જલસ કાઉન્ટી સુધી અનુભવાઈ હતી. ભૂકંપ પછી અનેક નાના આંચકા અનુભવાયા હતા. મને લાગ્યું હતું કે બારીઓ ખૂબ ધ્રુજતી હોવાથી તૂટી જશે, પણ તૂટી નહીં, ૧૮૭૦ના દાયકાથી જુલિયનમાં કાર્યરત સોનાની ખાણના માલિક પોલ નેલ્સને કહ્યું કે, વાઇબ્રેશનને કારણે કાઉન્ટર પર રાખેલા ફોટો ફ્રેમ નીચે પડી ગયા. પરિવહન અધિકારીઓએ ચેતવણી જારી કરી છે કે પ્રવાસીઓએ ટેકરીઓ પરથી રસ્તાઓ અને હાઇવે પર પડતા પથ્થરોથી સાવધ રહેવું જોઈએ. જુલિયનના ઉત્તર પશ્ચિમમાં સ્ટેટ રૂટ 76 પર પર્વતો પરથી પથ્થરો પણ નીચે આવી ગયા.

ટ્રેન સેવા થોડા સમય માટે બંધ કરવામાં આવી

સાન ડિએગો કાઉન્ટીમાં કેલિફોર્નિયા ડિપાર્ટમેન્ટ ઓફ ટ્રાન્સપોર્ટેશને જણાવ્યું હતું કે, ટીમો રસ્તાઓનું નિરીક્ષણ કરી રહી છે જેથી કોઈ નુકસાન થયું છે કે નહીં તે નક્કી કરી શકાય. સાન ડિએગો ઝૂ સફારી પાર્કમાં આફ્રિકન હાથીઓના ટોળાને ભૂકંપ દરમિયાન તેમના બાળકોને ઘેરી લેતા અને તેમનું રક્ષણ કરતા વીડિયોમાં કેદ કરવામાં આવ્યો હતો. હાથીઓમાં તેમના પગ દ્વારા અવાજ અથવા કંપન અનુભવવાની ક્ષમતા હોય છે, અને તેઓ રક્ષણ માટે વર્તુળમાં ઉભા રહે છે. નોર્થ કાઉન્ટી ટ્રાન્ઝિટ ડિસ્ટ્રિક્ટના પ્રવક્તા મેરી ડોવરે એસોસિએટેડ પ્રેસને મોકલેલા ઇ-મેઇલમાં જણાવ્યું હતું કે ભૂકંપથી કોઈ નુકસાન થયું છે કે કેમ તે નક્કી કરવા માટે કામદારો ટ્રેકનું નિરીક્ષણ કરી શકે તે માટે ટ્રેન સેવા થોડા સમય માટે બંધ કરવામાં આવી હતી.

ભૂકંપને કારણે જાનહાનિ કે સંપત્તિને નુકસાનના કોઈ અહેવાલ નહીં

સાન ડિએગો કાઉન્ટીમાં કેલિફોર્નિયા ડિપાર્ટમેન્ટ ઓફ ફોરેસ્ટ્રી એન્ડ ફાયર પ્રોટેક્શનના કેપ્ટન થોમસ શૂટ્સે જણાવ્યું હતું કે, જ્યારે જમીન ધ્રુજવા લાગી ત્યારે સાવચેતી તરીકે શાળાના બાળકોને ઇમારતોમાંથી બહાર કાઢવામાં આવ્યા હતા. તેને કંપનનો સંકેત મળ્યો અને પછી તેને વસ્તુઓ ગબડતી અને અથડાતી અનુભવાઈ. તેમણે કહ્યું,'ચારે બાજુ ખૂબ જ હંગામો અને અરાજકતા હતી. પરંતુ સદનસીબે વસ્તુઓ ટૂંક સમયમાં સામાન્ય થઈ ગઈ. સાન ડિએગો કાઉન્ટી પોલીસ વિભાગે જણાવ્યું હતું કે ભૂકંપને કારણે તેમને જાનહાનિ કે સંપત્તિને નુકસાનના કોઈ અહેવાલ મળ્યા નથી.

ભૂકંપની જાણ એક કે બે સેકન્ડ પહેલા જ કરવામાં આવી હતી

દક્ષિણ કેલિફોર્નિયાના અનુભવી ભૂકંપશાસ્ત્રી લ્યુસી જોન્સના જણાવ્યા અનુસાર, ભૂકંપ એલ્સિનોર ફોલ્ટ ઝોન નજીક 8.3 માઇલ (13.4 કિલોમીટર)ની ઊંડાઈએ આવ્યો હતો. એલ્સિનોર ફોલ્ટ ઝોન કેલિફોર્નિયાના સૌથી વ્યસ્ત ભૂકંપ ઝોનમાંનો એક છે અને તે પ્રખ્યાત સાન એન્ડ્રેસ ફોલ્ટ સિસ્ટમનો એક ભાગ છે, જ્યાં દર વર્ષે ઓછામાં ઓછો એક 4.0 ની તીવ્રતાનો ભૂકંપ આવે છે. જોન્સે જણાવ્યું હતું કે, રવિવારે જુલિયનમાં અનુભવાયેલો ભૂકંપ 3.5ની તીવ્રતાનો હતો. સાન ડિએગો કાઉન્ટીના કેટલાક રહેવાસીઓ કે જેઓ યુએસજીએસની શેકએલર્ટ પ્રારંભિક ચેતવણી પ્રણાલીના સબ્સ્ક્રાઇબર્સ છે, તેમને સોમવારના ભૂકંપની જાણ એક કે બે સેકન્ડ પહેલા જ કરવામાં આવી હતી.