સાઉથ આફ્રિકાની ટીમ 2 મેચની ટેસ્ટ શ્રેણી માટે બાંગ્લાદેશના પ્રવાસે જવાની છે. આ સિરીઝ 21 ઓક્ટોબરથી શરૂ થશે. ક્રિકેટ સાઉથ આફ્રિકાએ આ શ્રેણી માટે પોતાની ટીમની જાહેરાત કરી છે. પરંતુ કેપ્ટન ટેમ્બા બાવુમા બાંગ્લાદેશ સામે ઢાકાના શેર-એ-બાંગ્લા સ્ટેડિયમમાં રમાનારી પ્રથમ ટેસ્ટમાંથી બહાર થઈ ગયો છે. ત્યારે સિરીઝની પ્રથમ મેચ માટે નવા કેપ્ટનના નામની જાહેરાત કરવામાં આવી છે.

આ ખેલાડી ટેમ્બા બાવુમાના સ્થાને ટીમની સંભાળશે કમાન

ટેમ્બા બાવુમા ટીમ સાથે ઢાકા જશે, પરંતુ પ્રથમ મેચમાં ભાગ લેશે નહીં. ઈજાના કારણે તે આ મેચનો ભાગ બની શકશે નહીં. તે બીજી ટેસ્ટની તૈયારીમાં મેડિકલ ટીમની દેખરેખ હેઠળ તેની રિકવરી ચાલુ રાખશે અને જ્યારે તે સ્વસ્થ થઈ જશે ત્યારે તે મેચનો ભાગ બનશે. એઇડન માર્કરામ શ્રેણીની શરૂઆતની મેચમાં ટીમની કમાન સંભાળશે. આ સિવાય ટેમ્બા બાવુમાના સ્થાને ડેવાલ્ડ બ્રેવિસને ટીમમાં સામેલ કરવામાં આવ્યો છે. યુવા બેટ્સમેન ડીવાલ્ડ બ્રેવિસની પ્રથમ વખત ટેસ્ટ ટીમમાં પસંદગી કરવામાં આવી છે.

આયર્લેન્ડ શ્રેણીમાં થયો હતો ઈજાગ્રસ્ત

ટેમ્બા બાવુમા આ મહિનાની શરૂઆતમાં આયર્લેન્ડ સામે રમાયેલી વનડે શ્રેણી દરમિયાન ઈજાગ્રસ્ત થયો હતો અને તે મેચમાં તે મેદાનમાં ઉતરી શક્યો ન હતો. આ પછી તેને સિરીઝની છેલ્લી મેચમાંથી પણ બહાર થવું પડ્યું હતું.