આરોપી ઝડપાયો

ખંભાળિયા શહેરમાં રવિવારે એક હોસ્પિટલ નજીકથી મોટરસાયકલની ચોરી થતી હોવાનો બનાવ સી.સી.ટી.વી. કેમેરામાં કેદ થયો છે. જે સંદર્ભે આરોપીની અટકાયત કરી લેવામાં આવી હતી.

આ અંગેની વિગત મુજબ ખંભાળિયાના ચાર રસ્તા વિસ્તાર નજીક રવિવારે સવારના સમયે એક હોસ્પિટલની નીચેના ભાગેથી એક અજાણ્યો શખ્સ શિફતપૂર્વક ચાલાકી દાખવીને એક મોટરસાયકલ હંકારી ગયો હોવાનો બનાવ સોશિયલ મીડિયામાં વાયરલ થયો છે. જે અંગેના સીસીટીવી ફૂટેજ સોશિયલ મીડિયામાં ફરતા થયા છે.

આ વચ્ચે ખંભાળિયા તાલુકાના સખપર નાગડા ગામે રહેતા અને મેડિકલ ના વ્યવસાય સાથે સંકળાયેલા મુકેશભાઈ વરવાભાઈ કંડોરીયા નામના 29 વર્ષના યુવાને તેમનું રૂપિયા 90,000 ની કિંમતનું જી.જે. 37 એલ. 8848 નંબરનું સ્પ્લેન્ડર મોટરસાયકલ કોઈ શખ્સ રવિવારના સમયે તેમની લાઈફ લાઈન સર્જીકલ નામની દુકાનના ગેઈટ પાસેથી ચોરી કરીને લઈ ગયો હોવાની ધોરણસર ફરિયાદ ખંભાળિયા પોલીસ મથકમાં નોંધાવવામાં આવી છે. ત્યારે સોશિયલ મીડિયામાં વાયરલ થયેલા બાઈક ચોરીના વિડીયો સાથે ઉપરોક્ત ચોરીનો બનાવ સંકળાયેલો હોવાનું ખુલતા પોલીસ દ્વારા કલ્યાણપુર તાલુકાના રહીશ એવા આરોપીને ઝડપી લેવામાં આવ્યો છે.