બે ની પાસા હેઠળ અટકાયત

જામનગર શહેરમાં આગામી લોકસભાની ચૂંટણીને અનુલક્ષીને દારૂના ધંધાર્થીઓને કંટ્રોલમાં કરવાના ભાગરૂપે જિલ્લા પોલીસ વડા દ્વારા બે બુટલેગર સામે પાસા નું શસ્ત્ર ઉગામવામાં આવ્યું છે, અને બંનેની પાસા હેઠળ અટકાયત કરી લઇ અમદાવાદ અને સુરતની જેલમાં ધકેલી દેવાયા છે.

જામનગરમાં સાધના કોલોની બ્લોક નંબર એમ -૬૯ ની પાછળ રહેતો મહેન્દ્ર ઉર્ફે બાડો રતિલાલ રાયઠઠ્ઠા કે જેની સામે ૭ થી વધુ દારૂ અંગેના કેસ નોંધાયેલા છે. જે દારૂના ધંધાર્થી સામે જિલ્લા પોલીસ વડા દ્વારા પાસા હેઠળની દરખાસ્ત તૈયાર કરીને જિલ્લા સમાહર્તા સમક્ષ મોકલવામાં આવી હતી, જે મંજૂર કરવામાં આવી હોવાથી એસપી પ્રેમસુખ ડેલુની સૂચનાથી એલસીબી ની ટુકડીએ દારૂના ધંધાર્થી મહેન્દ્ર રતિલાલ રાયઠઠ્ઠા ની પાસા હેઠળ અટકાયત કરી લઇ અમદાવાદની સાબરમતી જેલમાં ધકેલી દેવાયો છે.

આ ઉપરાંત સાધના કોલોની વિસ્તારમાં જ રહેતા અભિષેક ઉર્ફે શેરો મુકેશભાઈ બદીયાણી નામના શખ્સ સામે પણ દારૂ અંગેના બે કેસ નોંધાયા હોવાથી તેની સામે પણ પાસા હેઠળની દરખાસ્ત મંજુર કરવામાં આવી હતી. અને તે મંજૂર થઈને આવી હોવાથી એલસીબી ની ટુકડીએ અભિષેક બદીયાણી ની પણ પાસા હેઠળ અટકાયત કરી લઈ સુરતની લાજપોર જેલમાં ધકેલી દેવાયો છે.