પોરબંદરના રાણાવાવમાં સરકારી વિનયન કોલેજ નજીક વહેતા પાણીને લીધે રોડનું ધોવાણ થયુ છે અને ઉંડા ખાડા પડી ગયા હોવાથી અકસ્માતનો ભય સેવાઇ રહ્યો છે અને તંત્ર વહેલીતકે સમારકામ કરાવે તેવી કલેકટરને રજૂઆત થઇ છે.
પોરબંદર જીલ્લા યુવા ભાજપ મહામંત્રી જગદીશ બાપોદરાએ જીલ્લા કલેકટરને કરેલી રજુઆતમાં જણાવ્યું છે કે,રાણાવાવ ખાતે આવેલ સરકારી વિનયન કોલેજની બાજુમાં આવેલા અંડરબ્રિજની પાસે રોડમાં છેલ્લા ત્રણ માસથી સતત વહેતા પાણીના કારણે અતિશય અને અસહ્ય મોટા ખાડા પડી ગયેલ છે તેમજ ખુબ મોટું નાલું પડી ગયેલ છે,જેના કારણે રોજબરોજ છાસવારે કાયમી અકસ્માત થતા હોય અને લોકોને ખુબ જ હાલાકીનો સામનો કરી રહ્યા હોય તો તાત્કાલિક ધોરણે આ સમસ્યાનું કાયમી નિરાકરણ કરી આપવા માંગ કરવામાં આવી છે.