જનાના હોસ્પિટલ પાસેથી રીક્ષાની ચોરી કરનાર શખસને એ ડિવિઝન પોલીસ મથકના સ્ટાફે રૈયા ચોકડી પાસેથી ઝડપી લઇ તેની પાસેથી ચોરીની રીક્ષા કબજે કરી હતી.મૂળ જોડીયાન વતની આ શખસ સામે રાજકોટ,મોરબી અને હળવદમાં મળી ચોરીના ત્રણ ગુના નોંધાઇ ચૂકયા હોવાનું માલુમ પડયું છે.

જાણવા મળતી વિગતો મુજબ,એ ડિવિઝન પોલીસ મથકના પીઆઇ આર.જી.બારોટની રાહબરી હેઠળ એએસઆઇ એમ.સી.લુવા તથા તેમની ટીમ મિલકત સંબધં અણઉકેલ બનાવનો ભેદ ઉકેલવા તપાસમાં હતી.દરમિયાન ગત તા.૧૬૫ ના રોજ જનાના હોસ્પિટલના એન્ટ્રી ગેટ સામે બ્રિજ નીચે રાખેલી રીક્ષા ચોરી થઇ હોય જે અંગે એ ડિવિઝન પોલીસ મથકમાં ફરિયાદ દાખલ થઇ હતી.પોલીસે આ બનાવને લઇ સીસીટીવી ફટેજ ચકાસતા આ રીક્ષા રૈયા ચોકડી તરફ હોવાનું માલુમ પડયું હતું.જેથી પીએસઆઇ એસ.એમ.રાણા તથા હેડ કોન્સ. અજયભાઇ બસીયા અને કોન્સ. રમેશભાઇ માલકીયા સહિતના સ્ટાફે તુરતં અહીં પહોંચી રીક્ષા સાથે ઉભેલા શખસને કોર્ડન કરી રીક્ષા ચોરીની આ રીક્ષા કબજે કરી હતી.
પોલીસે ચોરાઉ રીક્ષા સાથે હાલ રખડતું ભટકતું જીવન પસાર કરતા મુળ જોડીયાના વતની જીતેન્દ્ર ઉર્ફે જીત્યો ગોવિંદભાઇ પરમાર(ઉ.વ ૨૪) ને ઝડપી લીધો હતો.પોલીસે જણાવ્યું હતું કે આરોપી જીતેન્દ્ર ઉર્ફે જીત્યા સામે અગાઉ રાજકોટના પ્ર.નગર પોલીસ સ્ટેશનમાં તથા મોરબીના એ ડિવિઝન પોલીસ સ્ટેશનમાં અને હળવદ પોલીસ સ્ટેશનમાં ચોરીના ગુના નોંધાઇ ચૂકયા છે.આ શખસની અન્ય કોઇ ચોરીના ગુનામાં સંડોવણી છે કે કેમ? તે અંગે પોલીસ તપાસ ચલાવી રહી છે