ગુજરાત માર્ગ અને વાહન વ્યવહાર નિગમના રાજકોટ એસટી ડિવિઝન ને હોળી ધુળેટીના તહેવારો બરાબર ફળ્યા છે અને આ સમયગાળામાં એક્સ્ટ્રા બસોની ૩૩૦ ટ્રિપ દોડાવતા રૂ.૪૦ લાખની એક્સ્ટ્રા આવક થઇ છે.
વિશેષમાં રાજકોટ એસટી ડિવિઝનના વિભાગીય નિયામક જે.બી.કલોતરાએ જણાવ્યું હતું કે રાજકોટ એસટી બસ પોર્ટ, ગોંડલ, મોરબી, જસદણ, વાંકાનેર, ચોટીલા, લીંબડી, ધ્રાંગધ્રા અને સુરેન્દ્રનગર સહિતના નવ ડેપો ખાતેથી એક્સ્ટ્રા બસો દોડાવાઇ હતી જેમાં મુખ્યત્વે દાહોદ ગોધરા રૂટ ઉપર જ સૌથી વધુ એક્સ્ટ્રા બસ દોડાવાઇ હતી. કુલ ૩૩૦ ટ્રિપ દોડાવતા તે પેટે રૂ. ૪૦ લાખની એક્સ્ટ્રા સર્વિસની ઇન્કમ થઇ હતી. તદઉપરાંત અન્ય રોજિંદી બસોમાં દ્વારકા રૂટની બસોમાં સૌથી વધુ ટ્રાફિક જોવા મળ્યો હતો, સામાન્ય દિવસોમાં ડિવિઝનની દૈનિક આવક રૂ.૫૫ લાખ થતી હોય છે જે હોળી અને ધુળેટીના તહેવારો દરમિયાન રૂ.૬૦ લાખએ પહોંચી હતી. આમ રોજિંદી આવકમાં પણ તહેવારોને લઇ વધારો જોવા મળ્યો હતો. તેમણે ઉમેર્યું હતું કે હોળાષ્ટક ઉતરતા આમ પણ પેસેન્જર ટ્રાફિક વધતા આગામી દિવસોમાં આવક હજુ વધશે.