દ્વારકાના આવળ પરા વિસ્તારમાં આવેલા આવળ માતાજીના મંદિરની પાછળના ભાગે રહેતા મેહુલભાઈ ઉર્ફે દુદાભાઈ રાણાભાઈ લુણા નામના રબારી યુવાનના પિતા રાણાભાઈ ગત તારીખ 12 ઓક્ટોબરના રોજ દ્વારકામાં પોરબંદર હાઈવે માર્ગ પર આવેલા પેટ્રોલ પંપ પાસેથી ચાલીને જઈ રહ્યા હતા. તે દરમિયાન પૂરઝડપે અને બેફિકરાઈપૂર્વક આવી રહેલી જી.જે. 10 ડી.આર 2734 નંબરની એક મોટરકારના ચાલકે રાણાભાઈને અડફેટે લેતા તેમને ગંભીર ઈજાઓ સાથે સારવાર અર્થે હોસ્પિટલમાં ખસેડવામાં આવ્યા હતા. જ્યાં સારવાર દરમિયાન તેમનું મૃત્યુ નીપજ્યું હતું. આ બનાવ અંગે મૃતકના પુત્ર મેહુલભાઈ લુણાની ફરિયાદ પરથી દ્વારકા પોલીસે કારના ચાલક સામે જુદી-જુદી કલમ હેઠળ ગુનો નોંધી આગળની તપાસ હાથ ધરી છે.

સર્પદંશ થતા ટિંબડીના યુવાનનું મૃત્યુ

ખંભાળિયા તાલુકાના ટિંબડી ગામે રહેતા અરવિંદસિંહ હમીરજી જાડેજા નામના 24 વર્ષના યુવાનને રવિવારે તેમની વાડીએ ઝેરી સર્પે દંશ દેતા તેમનું મૃત્યુ નીપજ્યું હતું. આ બનાવ અંગેની જાણ મનોહરસિંહ ભીખુભા જાડેજા (ઉ.વ. 40, રહે. ટિંબડી) એ અહીંની પોલીસને કરી છે.