• સગાઇ બાદ કપલે પહેલી વાર સાથે ગોલ્ડન ટેમ્પલમાં દર્શન કર્યા 
• પરિ અને રાઘવ રાજસ્થાનમાં લગ્ન માટે સ્થળ શોધી રહ્યા છે

બોલીવુડ એક્ટ્રેસ પરિણીતી ચોપરા અને આમ આદમી પાર્ટીના સાંસદ રાઘવ ચઢ્ઢા નવા સેલિબ્રિટી કપલ્સ પૈકીના એક છે. રાઘવ અને પરિણીતીએ મે મહિનામાં જ દિલ્હીમાં પરિવાર અને મિત્રોની હાજરીમાં સગાઈ કરી હતી. સગાઈમાં અરવિંદ કેજરીવાલ સહિતના જાણીતા નેતાઓ પહોંચ્યા હતા. પરિણીતીની કાકાની દીકરી અને એક્ટ્રેસ પ્રિયંકા ચોપરા પર સગાઈમાં ભાગ લેવા ખાસ લોસ એન્જેલસથી દિલ્હી આવી હતી. સગાઈ બાદ ચર્ચા શરૂ થઈ હતી કે, કપલ ચાલુ વર્ષના અંત સુધીમાં લગ્ન કરી લેશે.

રાઘવ ચઢ્ઢા અને પરિણીતી ચોપરા થોડા દિવસ પહેલા જ ઉદયપુરમાં લગ્નનું સ્થળ જોવા પહોંચ્યા હતા. મીડિયા રિપોર્ટ્સનું માનીએ તો, કપલ રાજસ્થાનમાં લગ્ન કરવાનું વિચારી રહ્યા છે અને સ્થળ શોધી રહ્યા છે. લગ્નની તૈયારીઓ વચ્ચે કપલ અમૃતસરના સુવર્ણ મંદિરમાં દર્શન કરવા પહોંચ્યા હતા. પરિણીતી અને રાઘવની સુવર્ણ મંદિરમાંથી કેટલીય તસવીરો અને વિડીયો સોશિયલ મીડિયા પર વાયરલ થઈ રહ્યા છે. મહત્વનું છે કે, માર્ચ મહિનામાં પરિણીતી અને રાઘવ પહેલીવાર મુંબઈમાં સાથે ડિનર અને લંચ ડેટ પર જોવા મળ્યા હતા. એ પછી જ તેમના અફેરની ચર્ચા શરૂ થઈ હતી. જોકે, કપલે સગાઈ કરી ત્યાં સુધી તેમના સંબંધને છુપાવીને રાખ્યો હતો.

અમૃતસરથી સામે આવેલી તસવીરો અને વિડીયોમાં જોઈ શકાય છે કે રાઘવ અને પરિણીતી સુવર્ણ મંદિરમાં સાથે ફરી રહ્યા છે અને દર્શન કરી રહ્યા છે. પરિણીતીએ ઓફ-વ્હાઈટ રંગનો ડ્રેસ પહેર્યો છે અને માથે દુપટ્ટો ઓઢ્યો છે. જ્યારે રાઘવે સફેદ રંગનો કુર્તો-પાયજામો અને ગ્રે રંગનું નહેરુ જેકેટ પહેર્યું છે અને માથા પર નારંગી રંગનું કપડું બાંધ્યું છે. બંને હાથ જોડીને ચાલતા જોવા મળ્યા હતા.

પરિણીતી ચોપરા અને રાઘવ ચઢ્ઢા આ વર્ષે સપ્ટેમ્બરથી નવેમ્બરની વચ્ચે લગ્ન કરી શકે છે. કપલ રાજસ્થાનમાં લગ્નના બંધનમાં બંધાશે તેવી ચર્ચા છે. થોડા દિવસ પહેલા જ પરિણીતીએ ઉદયપુરના પર્યટન વિભાગના ડેપ્યુટી ડાયરેક્ટર સાથે મુલાકાત કરી હતી અને ત્યાંની સારી હોટેલ અને ફરવાના સ્થળો વિશે જાણકારી મેળવી હતી. જો પરિણીતીના લગ્ન ઉદયપુરમાં થશે તો તે બહેન પ્રિયંકા ચોપરા અને જીજાજી નિક જોનસના પગલે ચાલશે કારણકે તેમના લગ્ન પણ અહીં જ થયા હતા.