રાજકોટ ખાતે આગામી તા.25 ફેબ્રુઆરીના રોજ દેશના પ્રધાનમંત્રી નરેન્દ્રભાઇ મોદી ત્રણ મેગા પ્રોજેક્ટના લોકાર્પણ માટે આવી રહ્યા છે ત્યારે તેમના કાર્યક્રમને અનુલક્ષીને કોઇપણ પ્રકારની કચાશ ન રહી જાય તે માટે સમગ્ર કાર્યક્રમનું પ્લાનિંગ કરવા તેમજ હાલ સુધીમાં કરેલી તૈયારીઓનો રિવ્યુ લેવા ગત સાંજે રાજકોટ જિલ્લા કલેક્ટર કચેરી ખાતે મહાનગરપાલિકા, એસટી તંત્ર, એઇમ્સ, સિવિલ હોસ્પિટલ સહિતના તમામ સરકારી વિભાગોની એક સંયુક્ત મહત્વપૂર્ણ મિટિંગ યોજવામાં આવી હતી જેમાં પીએમ મોદીના રાજકોટ કાર્યક્રમ માટે 1400 એસટી બસ ફાળવવા સૂચના અપાઇ હોવાનું જાણવા મળે છે.

વિશેષમાં સૂત્રોમાંથી પ્રાપ્ત વિગતો મુજબ રૂ.1100 કરોડથી વધુ રકમના ખર્ચે નિર્મિત 250 બેડની હોસ્પિટલ સાથેની એઇમ્સ, 100 કરોડના ખર્ચે નિર્મિત 11 માળની જનાના હોસ્પિટલ તેમજ રાજકોટ મહાનગરપાલિકાના સ્માર્ટ સિટી પ્રોજેક્ટ અંતર્ગત રૂ.136 કરોડના ખર્ચે નિર્મિત અટલ સરોવર સહિતના પ્રોજેક્ટનું તા.25 ફેબ્રુઆરીએ પ્રધાનમંત્રીના હસ્તે લોકાર્પણ થનાર છે. સૌપ્રથમ તા.25ના સવારે દ્વારકા ખાતે રૂ.1000 કરોડના ખર્ચે સિગ્નેચર બ્રિજનું લોકાર્પણ કયર્િ બાદ પ્રધાનમંત્રી બપોરે રાજકોટ પહોંચશે અને ઉપરોક્ત ત્રણ પ્રોજેક્ટ્સના લોકાર્પણ બાદ જંગી જાહેરસભાને સંબોધશે.
દરમિયાન રાજકોટ એસટી ડિવિઝનના સુત્રોમાંથી પ્રાપ્ત વિગતો મુજબ ગત સાંજે મળેલી મિટિંગમાં પીએમના રાજકોટના કાર્યક્રમ માટે સમગ્ર રાજ્ય સ્તરેથી કુલ 1400 એસટી બસ ફાળવવા માટે આદેશ કરવામાં આવ્યો છે, રાજકોટ એસટી ડિવિઝનની 200 બસ ઉપરાંત રાજ્યના તમામ 16 એસટી ડિવિઝનમાંથી કુલ 1400 બસ પીએમના ઉપરોક્ત કાર્યક્રમ માટે ફાળવાશે.અત્રે ઉલ્લેખનીય છે કે ઉપરોક્ત લોકાર્પણ સમારોહ ફક્ત રાજકોટ શહેર પૂરતો જ મર્યિદિત નહીં રહે પરંતુ તેમાં સમગ્ર સૌરાષ્ટ્ર કચ્છ અને ગુજરાતમાંથી જનતા ઉમટશે. પીએમની જાહેરસભાનું સ્થળ હજુ ફાઇનલ થયું નથી પરંતુ ન્યુ રેસકોર્સ-અટલ સરોવર ખાતે જાહેરસભા યોજાય તેવી શકયતા છે.