છત્તીસગઢના બીજાપુર જિલ્લામાં આજે નક્સલવાદીઓ દ્વારા લગાવવામાં આવેલા આઇઇડી IED વિસ્ફોટમાં સેન્ટ્રલ રિઝર્વ પોલીસ ફોર્સ (સીઆરપીએફ)નો એક જવાન ઘાયલ થયો હતો. અધિકારીના જણાવ્યા અનુસાર સીઆરપીએફની ૧૯૬મી બટાલિયનની એક ટીમ સવારે મહાદેવ ઘાટ વિસ્તારમાં પેટ્રોલિંગ કરી રહી હતી. ત્યારે અચાનક જ વિસ્ફોટ થયો હતો.

વધુમા જણાવ્યું હતું કે, પેટ્રોલિંગ દરમિયાન સીઆરપીએફના જવાને અજાણતામાં પ્રેશર આઇઇડી પર પગ મૂકી દીધો હતો, જેના કારણે વિસ્ફોટ થયો હતો. આથી જવાન ઘાયલ થયો હતો અને તેને બીજાપુર જિલ્લા હોસ્પિટલમાં દાખલ કરવામાં આવ્યો હતો.

આ પહેલા શુક્રવારે બીજાપુર જિલ્લાને અડીને આવેલા નારાયણપુર જિલ્લામાં બે સ્થળોએ નક્સલીઓ દ્વારા લગાવવામાં આવેલા આઇઇડી વિસ્ફોટમાં એક ગ્રામીણનું મોત થયું હતું અને ત્રણ લોકો ઘાયલ થયા હતા. 6 જાન્યુઆરીના રોજ, નક્સલીઓએ બીજાપુર જિલ્લામાં આઇઇડી વડે એક વાહનને ઉડાવી દીધું હતું, જેમાં આઠ પોલીસકર્મીઓ અને એક નાગરિક ડ્રાઇવરનું મોત થયું હતું.