રાજકોટ સહિત સમગ્ર સૌરાષ્ટ્રમાં શ્રાવણી સરવડા વરસતા ભાદર-1 સહિત છ ડેમમાં નવા નીરની આવક નોંધાઇ છે, જ્યારે અન્ય પાંચ ડેમ ઉપર હળવોથી ભારે વરસાદ નોંધાયો છે.
વિશેષમાં રાજકોટ સિંચાઇ વર્તુળના ફ્લડ સેલના જણાવ્યા મુજબ છેલ્લા 24 કલાક દરમિયાનમાં ભાદર-1માં 0.10 ફૂટ નવા નીરની આવક થતા સપાટી 21.60 ફૂટે પહોંચી છે. કુલ 34 ફૂટની ઉંડાઇનો ભાદર-1 ડેમ ઓવરફ્લો થવામાં હજુ 12.40 ફૂટનું છેટું છે. જ્યારે આજી-3 ડેમમાં 0.16 ફૂટ, મોરબી જિલ્લાના મચ્છુ-2માં 0.13 ફૂટ, ધોડાધ્રોઇમાં 0.16 ફૂટ, સુરેન્દ્રનગર જિલ્લામાં વઢવાણ ભોગાવો-2 (ધોળી ધજા)માં 0.30 ફૂટ, અમરેલી જિલ્લામાં સાંકરોલી ડેમમાં અડધો ફૂટ નવું પાણી આવ્યું છે. આ ઉપરાંત અન્ય પાંચ ડેમ સાઈટ ઉપર વરસાદ નોંધાયો છે જેમાં વાછપરી ડેમ ઉપર પાંચ મીમી, છાપરવાડી-2 ડેમ ઉપર 15 મીમી, ભાદર-2 ઉપર પાંચ મીમી, મચ્છુ-2 ઉપર પાંચ મીમી, ડેમી-2 ઉપર 17 મીમી વરસાદ નોંધાયો છે.
રાજકોટ શહેરને પીવાનું પાણી પુરૂ પડતા મુખ્ય જળસ્ત્રોત આજી-1 અને ન્યારી-1 ડેમમાં નવા નીરની આવક નથી તેમજ ડેમ સાઈટ ઉપર પણ વરસાદ નથી.