તમિલનાડુના મદુરાઈ સ્ટેશન પર ટ્રેન દુર્ઘટનામાં જીવ ગુમાવનારાઓની ઓળખની કામગીરી ચાલી રહી છે. આ દુર્ઘટનામાં 9 લોકોના મોત થયા હતા, જેમાંથી 6 લોકોની ઓળખ થઈ ગઈ છે અને અન્ય ત્રણની ઓળખ થવાની બાકી છે. ત્યારે ભસીન ટુર-ટ્રાવેલ્સ કંપનીના માલિક હરીશ કુમાર ભસીન સહિત છ લોકો ગુમ છે. જે મૃતકોની ઓળખ થઈ છે તેમાંથી બે લખનૌના અને બે સીતાપુરના છે. એક-એક મૃતક લખીમપુર અને હરદોઈનો છે.

નોંધનીય છે કે તમિલનાડુના મદુરાઈ સ્ટેશન પર પાર્ક કરેલી પુનાલુર-મદુરાઈ એક્સપ્રેસ ટ્રેનના એક ખાનગી કોચમાં શનિવારે સવારે આગ લાગી હતી. મુસાફરો દ્વારા ટ્રેનમાં લઈ જવામાં આવેલા ગેસ સિલિન્ડરમાં બ્લાસ્ટ થવાથી આગ લાગી હતી. કોચમાં લાગેલી આગ એટલી ગંભીર હતી કે તેને ઓલવવા માટે ફાયર બ્રિગેડના જવાનોને ભારે જહેમત ઉઠાવવી પડી હતી. અકસ્માત બાદ રેલવેએ મૃતકોના પરિવારજનોને વળતરની જાહેરાત કરી છે.