ગઇકાલે 35 કિ.મી.ની ઝડપે પવન ફુંકાયો

જામનગર અને દેવભુમિ દ્વારકા જિલ્લામાં મેઘરાજાએ ગામડામાં વરસાદ વરસાવ્યા બાદ ગઇકાલે વિરામ રાખ્યો હતો, જામનગર શહેરમાં ઝરમર-ઝરમર વરસાદના ઝાપટા પડયા હતાં જયારે દ્વારકામાં પણ બે વખત ઝાપટા પડયા હતાં, આજે પણ વરસાદી વાતાવરણ નથી ત્યારે ખેડુતો ખેતીકામમાં લાગી ગયા છે.

કલેકટર કચેરીના ક્ધટ્રોલ મના જણાવ્‌યા મુજબ મહત્તમ તાપમાન  30.4 ડીગ્રી, લઘુતમ તાપમાન 27 ડીગ્રી, હવામાં ભેજ 86 ટકા અને પવનની ગતિ 30 થી 35 કિ.મી. પ્રતિકલાક રહી હતી. જામનગર સહિત દેવભુમિ દ્વારકા જિલ્લાના કેટલાક ગામડાઓમાં આજ સવારથી વાદળીયું વાતાવરણ જોવા મળ્યું છે.

કાલાવડ અને જામજોધપુરમાં મોટાભાગે કપાસ અને મગફળીનું વાવેતર વધુ થાય છે, બંને તાલુકામાં સારો વરસાદ થયો છે, જો કે આ વખતે સોળઆની વર્ષ થાય તેવી પણ શકયતા છે, દેવભુમિ દ્વારકા જિલ્લામાં તો કલ્યાણપુર, દ્વારકા અને ખંભાળીયામાં મોસમનો કુલ વરસાદ 55 ઇંચ આસપાસ પહોંચી ગયો છે, કેટલાક ખેતરોમાં પાણી ભરાયા છે ત્યારે ખેડુતોએ કપાસ અને મગફળીનું વાવેતર કર્યુ હતું તેમાં ભારે નુકશાન થયું છે.

કપાસના પાકમાં ચુસીયા જીવાતનું પ્રમાણ વઘ્યું હોવાનું પણ જાણવા મળે છે, જો કે હજુ ચોમાસુ 70 ટકા બાકી છે, હાલારના બંને જિલ્લાનાઓના ડેમો ભરાઇ ચૂકયા છે ત્યારે વધુ વરસાદ થશે તો નુકશાન થવાની પણ શકયતા નકારી શકાય તેમ નથી.