રાજકોટના પ્રભારી સચિવ રાહુલ ગુપ્તાના અધ્યક્ષસ્થાને કલેક્ટર કચેરી-રાજકોટ ખાતે સમીક્ષા બેઠક યોજાઇ હતી. જેમાં સચિવએ તમામ વિભાગોની પ્રિમોન્સૂન સહિતની કામગીરી વિશે વિગતવાર માહિતી મેળવી સમીક્ષા હાથ ધરી હતી.

બેઠકમાં જિલ્લા કલેક્ટર પ્રભવ જોશીએ પ્રભારી સચિવને વિવિધ વિભાગોની જિલ્લા કક્ષાએ થયેલી કામગીરી સવિસ્તાર જણાવી હતી. સચિવશ્રીએ આ સાથે પ્રિ મોન્સૂન તૈયારીઓ પર વિશેષ ભાર આપતા પી.જી.વી.સી.એલ. વિભાગને મેઇન્ટેનન્સની કામગીરી વહેલી તકે પૂર્ણ કરવા, આરોગ્ય વિભાગને દવાઓનો જરૂરી સ્ટોક, ક્લોરિન તથા સાધનો વગેરે તૈયાર રાખવા સાથે જ માર્ગ અને મકાન વિભાગને ડમ્પર, ટ્રક, જે.સી.બી. સહિતની અન્ય મશીનરી તૈયાર રાખવા જણાવ્યું હતું.

સચિવએ અનાજ અને પુરવઠાની હાલની સ્થિતિની સમીક્ષા કરી, જિલ્લામાં ચાલતી ચણા, રાયડો અને બાજરીની ટેકાના ભાવની ખરીદી વિશે વિગતવાર ચર્ચા કરી હતી. જેમાં ખેડૂતોને પ્રોત્સાહન સાથે ખરીદ કેન્દ્રો પર તમામ સુવિધાઓ મળે તે માટે કામગીરી કરવા સૂચના આપી હતી. તેમણે સોશિયલ મીડિયાના માધ્યમથી ફેલાતી અફવાઓથી દૂર રહેવા નાગરિકોને અપીલ કરી હતી.

આ બેઠકમાં મ્યુનિસિપલ કમિશનર તુષાર સુમેરા, જિલ્લા વિકાસ અધિકારી અનંદુ સુરેશ ગોવિંદ, એસ.પી. હિમકરસિંહ, અધિક નિવાસી કલેક્ટર એ.કે.ગૌતમ, આસિસ્ટન્ટ કલેક્ટર મહેક જૈન, ડી.સી.પી. ક્રાઈમ પાર્થરાજસિંહ ગોહિલ, સર્વે પ્રાંત અધિકારી, સર્વે નાયબ જિલ્લા વિકાસ અધિકારી સહિત વિવિધ વિભાગના વરિષ્ઠ અધિકારીઓ-કર્મચારીઓ ઉપસ્થિત રહ્યા હતા.