ICC ચેમ્પિયન્સ ટ્રોફી 2025ના ગઈકાલના મેચમાં ભારતે પાકિસ્તાનને છ વિકેટથી હરાવ્યું. દુબઈ ઈન્ટરનેશનલ ક્રિકેટ સ્ટેડિયમ ખાતે રમાયેલી આ મેચમાં ભારતીય ટીમને જીતવા માટે 242 રનનો લક્ષ્યાંક મળ્યો હતો, જે તેણે વિરાટ કોહલીની જોરદાર સદી (અણનમ 100) ની મદદથી સરળતાથી પ્રાપ્ત કરી લીધો. આ જીત સાથે ભારતીય ટીમ સેમિફાઇનલમાં પહોંચવાની નજીક છે. દરમિયાન, પાકિસ્તાની ટીમ સંપૂર્ણ રીતે ટુર્નામેન્ટમાંથી બહાર નીકળવાની નજીક છે.

રિઝવાને પોતાનું દુઃખ વ્યક્ત કર્યું...

મેચમાં હાર બાદ પાકિસ્તાની કેપ્ટન મોહમ્મદ રિઝવાન ખૂબ જ નિરાશ દેખાતા હતા. રિઝવાને કહ્યું કે હવે તેમની ટીમ માટે કંઈ બચ્યું નથી અને તેમની ટીમનું અભિયાન એક રીતે સમાપ્ત થઈ ગયું છે. રિઝવાને સદી બનાવનાર વિરાટ કોહલીની ખૂબ પ્રશંસા કરી. રિઝવાને કહ્યું કે કોહલીની ફિટનેસ અને શિસ્ત પ્રશંસનીય છે.

મોહમ્મદ રિઝવાને મેચ પછી કહ્યું કે આપણે કહી શકીએ છીએ કે અમારું અભિયાન લગભગ પૂરું થઈ ગયું છે. અમારે અન્ય મેચોના પરિણામો પર આધાર રાખવો પડશે. એક મેચ બાકી છે. એક કેપ્ટન તરીકે મને આવી પરિસ્થિતિઓ પસંદ નથી. આપણું ભાગ્ય આપણા પોતાના હાથમાં હોવું જોઈએ. તેમણે આ જીતનો શ્રેય ભારતને આપ્યો ખાસ કરીને વિરાટ કોહલીને, જેમણે પોતાની 51મી ODI સદી ફટકારી.

મોહમ્મદ રિઝવાન કહે છે કે તે એટલી મહેનત કરે છે કે મને તે જોઈને આશ્ચર્ય થાય છે. આખી દુનિયા કહી રહી હતી કે તે ફોર્મમાં નથી પણ તેણે આટલી મોટી મેચમાં ખૂબ આરામથી રન બનાવ્યા. તેની ફિટનેસ અને શિસ્ત પ્રશંસનીય છે. અમે તેને આઉટ કરવાનો ખૂબ પ્રયાસ કર્યો પણ ન કરી શક્યા. આ પરિણામથી અમે નિરાશ છીએ. અમે બધા વિભાગોમાં ભૂલો કરી અને વચ્ચેની ઓવરોમાં વિકેટ લઈ શક્યા નહીં.

રિઝવાને આગળ કહ્યું કે અમે ટોસ જીત્યો પણ ટોસનો ફાયદો મળ્યો નહીં. અમને લાગ્યું કે આ પીચ પર 280નો સ્કોર સારો રહેશે. તેમના બોલરોએ વચ્ચેની ઓવરોમાં ખૂબ સારી બોલિંગ કરી અને અમારી વિકેટો લીધી. મેં અને સઈદ શકીલે સમય લીધો કારણ કે અમે તેને ઊંડાણપૂર્વક સમજવા માંગતા હતા. ખરાબ શોટ પસંદગીને કારણે અમારા પર દબાણ આવ્યું અને તેથી અમે 240 રનમાં ઓલઆઉટ થઈ ગયા.

રિઝવાને કહ્યું કે જ્યારે પણ તમે હારશો તેનો અર્થ એ છે કે તમે બધા વિભાગોમાં સારું પ્રદર્શન નથી કર્યું. અમે તેમના પર દબાણ લાવવા માંગતા હતા પરંતુ અમે તેમ ન કરી શક્યા. અબરારે અમને એક વિકેટ અપાવી પણ બીજી બાજુ તેણે બીજા બોલરોની ઓવરમાં ખૂબ સારુ પ્રદર્શન કર્યું. વિરાટ કોહલી અને શુભમન ગિલે અમારી પાસેથી રમત છીનવી લીધી. અમારે અમારી ફિલ્ડિંગમાં પણ સુધારો કરવાની જરૂર છે.

રોહિતે જીત વિષે આ કહ્યું

ભારતીય કેપ્ટન રોહિત શર્માએ કહ્યું કે બોલ સાથે અમારી શરૂઆત શાનદાર રહી. અમને ખબર હતી કે વિકેટ ધીમી હોય શકે છે, તેમને આટલા સ્કોર સુધી મર્યાદિત રાખવાનો બોલિંગ યુનિટનો એક શાનદાર પ્રયાસ હતો. આનો શ્રેય કુલદીપ, અક્ષર, જાડેજાને જાય છે. શમી, હાર્દિક, હર્ષિતે જે રીતે બોલિંગ કરી તે ભૂલવું ન જોઈએ. આખી ટીમે સારું પ્રદર્શન કર્યું. હું એ શોધવાનો પ્રયાસ કરું છું કે બેટ્સમેનને સૌથી વધુ મુશ્કેલી કોણ આપી રહ્યું છે અને પછી નિર્ણય લઉં છું. વિરાટને દેશનું પ્રતિનિધિત્વ કરવાનું ગમે છે. વિરાટ જે કરે છે તે શ્રેષ્ઠ કરે છે.