વરિષ્ઠ IAS ગોવિંદ મોહન ગુરુવારે એટલે કે આજે નવા કેન્દ્રીય ગૃહ સચિવ તરીકેનો ચાર્જ સંભાળવા જઈ રહ્યા છે. તેઓ અજય કુમાર ભલ્લાનું સ્થાન લેશે, જેઓ આ મહત્વપૂર્ણ પદ પર પોતાનો પાંચ વર્ષનો કાર્યકાળ પૂરો કરી રહ્યા છે. કાશી હિંદુ યુનિવર્સિટીમાંથી B.Tech અને IIM અમદાવાદમાંથી PG ડિપ્લોમા ધરાવનાર ગોવિંદ કેબિનેટ સચિવ પછી નોકરશાહીના આ બીજા સર્વોચ્ચ પદ પર નિયુક્ત થતાં પહેલાં કેન્દ્રીય સંસ્કૃતિ સચિવ તરીકે કામ કરતા હતા.

કેન્દ્ર સરકારમાં કામ કરવાનો બહોળો અનુભવ

સિક્કિમ કેડરના 1989 બેચના IAS અધિકારી મોહન પહેલાથી જ કેન્દ્રીય ગૃહ મંત્રાલયમાં ઓફિસર ઓન સ્પેશિયલ ડ્યુટી તરીકેનો ચાર્જ સંભાળી ચૂક્યા છે. તેમને સિક્કિમ અને કેન્દ્ર સરકારમાં વિવિધ હોદ્દા પર કામ કરવાનો બહોળો અનુભવ છે.

મોહન હાલમાં સરકારમાં ફરજ બજાવતા સૌથી પ્રતિભાશાળી અધિકારીઓમાંના એક ગણાય છે અને તેમની સખત મહેનત માટે જાણીતા છે. અગાઉ તેમણે ગૃહ મંત્રાલયમાં અધિક સચિવ તરીકે સેવા આપી હતી અને કેન્દ્રશાસિત પ્રદેશો સહિત અનેક મુખ્ય વિભાગો સંભાળ્યા હતા.

કોવિડ-19 રોગચાળા દરમિયાન સારી રીતે કામ કર્યું

વરિષ્ઠ અમલદાર મોહન પણ કોવિડ-19 રોગચાળા દરમિયાન મુખ્ય સરકારી અધિકારી હતા અને તેમને વિવિધ પ્રોટોકોલ માટે લીધેલા નિર્ણયોના અમલીકરણ પર દેખરેખ રાખવા અને રાજ્યો સાથે સુગમ સંકલન સુનિશ્ચિત કરવાનું કામ સોંપવામાં આવ્યું હતું.

જમ્મુ-કાશ્મીરમાં શાંતિપૂર્ણ ચૂંટણી પડકાર

ચાર્જ સંભાળ્યા પછી મોહન સમક્ષ તાત્કાલિક પડકાર એ છે કે, જમ્મુ અને કાશ્મીરમાં શાંતિપૂર્ણ વિધાનસભાની ચૂંટણીઓ સુનિશ્ચિત કરવા માટે ચૂંટણી પંચ સાથે ગાઢ સંકલનમાં કામ કરવું. ચૂંટણી પંચે કેન્દ્રશાસિત પ્રદેશમાં 18 સપ્ટેમ્બરથી ત્રણ તબક્કામાં મતદાનની જાહેરાત કરી છે.