ઘર કામ કરવા જવા બાબતે તકરાર થતા પતિ વિફર્યો

જામનગર તાલુકાના રાવલસર ગામમાં રહેતા એક મહિલા પર તેના પતિએ છરી વડે હુમલો કરી દેતાં તેણીને લોહી નિતરતી હાલતમાં સારવાર માટે જામનગરની જી.જી. હોસ્પિટલમાં ખસેડાઇ છે, જ્યારે પોલીસે હુમલાખોર પતિ સામે ફરીયાદ દાખલ કરવામાં આવી છે.
જામનગર તાલુકાના રાવલસર-સરમત પાટીયા પાસે રહેતી માણસીબેન  ઉર્ફે લક્ષ્મી અજમલભાઈ રાજાણી નામની ૩૫ વર્ષની ચારણ યુવતી પર ગઈકાલે તેણીનાજ પતિ અજમલ લુણાભાઈ રાજાણીએ છરી વડે હુમલો કર્યો હતો. જેથી તેણીએ પતિને રોકવાનો પ્રયાસ કરતાં હાથમાં છરીના બે ઘા મારી દેતા ઇજા થયેલી હાલતમાં સારવાર માટે જામનગરની સરકારી જી.જી. હોસ્પિટલમાં ખસેડવામાં આવી હતી.
આ બનાવની જાણ થતાં સિક્કા પોલીસ સ્ટેશનનો સ્ટાફ જી.જી. હોસ્પિટલમાં દોડી આવ્યો હતો, અને માણસીબેનનું નિવેદન નોંધતાં તેણીએ પતિ અજમલ લુણાભાઈ રાજાણી સામે હુમલાની ફરિયાદ નોંધાવી હતી.
પોલીસ ફરિયાદમાં જણાવ્યા અનુસાર ફરિયાદીને ઘર કામ કરવા જઈ રહી હતી, દરમિયાન તેણીના પતિએ  ઘરકામ કરવા જવાની ના પાડી હતી, દરમ્યાન આરોપીએ અપશબ્દો બોલી ઉશ્કેરાઇને છરી વડે હાથના ભાગે તેણીને ઇજા પહોચાડી હતી અને ધમકી દીધી હતી.