રાજકોટ જિલ્લાની પાંચ નગરપાલિકાઓમાં ગઈકાલે સવારે સાત થી સાંજના 6:00 વાગ્યા સુધી મતદાનની પ્રક્રિયા હાથ ધરવામાં આવી હતી. સૌથી વધુ મતદાન ભાયાવદરની નગરપાલિકામાં 59.86% અને સૌથી ઓછું ધોરાજી નગરપાલિકામાં 51.33% નોંધાયું છે.
અન્ય ત્રણ નગરપાલિકાઓની વાત કરીએ તો જસદણમાં 52.14 જેતપુર (નવાગઢ)માં 52.54 અને ઉપલેટામાં 53.88% મતદાન થયું છે. આવતીકાલે આ તમામ પાંચે પાંચ નગરપાલિકાઓમાં મતગણતરી હાથ ધરીને પરિણામ જાહેર કરવામાં આવશે.
સાત વોર્ડની જસદણ નગરપાલિકામાં બે બેઠકો બિનહરીફ થઈ હોવાથી 26 બેઠકો માટે ચૂંટણી યોજવામાં આવી હતી. જેતપુર નવાગઢમાં 11 વોર્ડની 44 બેઠક માટે ધોરાજી નગરપાલિકામાં નવ વોર્ડની 36 બેઠક માટે ભાયાવદર નગરપાલિકામાં છ વોર્ડની 24 બેઠક માટે અને ઉપલેટા નગરપાલિકામાં 9 વોર્ડની 31 બેઠક માટે ચૂંટણી યોજવામાં આવી હતી. ઉપલેટામાં પાંચ બેઠકો ચૂંટણી પહેલા જ બિન હરીફ જાહેર થઈ ચૂકી હતી.
જસદણમાં પુરુષોનું 56.05 સ્ત્રીઓનું 48.04,જેતપુર નવાગઢમાં પુરુષોનું 56.40 સ્ત્રીઓનું 48.39,ધોરાજીમાં પુરુષોનું 54.30 સ્ત્રીઓનું 48.23,ભાયાવદરમાં પુરુષોનું 63.51 સ્ત્રીઓનું 55.94 અને ઉપલેટામાં પુરુષોનું 57.06 અને સ્ત્રીઓનું 50.57 ટકા મતદાન થયું છે. આમ દરેક નગરપાલિકા વિસ્તારમાં પુરુષો કરતાં સ્ત્રીઓનું મતદાન પ્રમાણમાં ચારથી આઠ ટકા જેટલું ઓછું રહ્યું છે.

તા. પં.ની પેટા ચૂંટણીમાં સરેરાશ 48.86% અને ડુમિયાણીમાં 67.10 ટકા મતદાન
રાજકોટ જિલ્લામાં આવેલી જુદી જુદી તાલુકા પંચાયતોમાં ખાલી પડેલી છ બેઠકોની પેટા ચૂંટણી પણ ગઈકાલે યોજવામાં આવી હતી. પેટા ચૂંટણીમાં સરેરાશ 48.86 ટકા મતદાન થવા પામ્યું હતું તેમાં સૌથી વધુ ઉપલેટા તાલુકાની ડુમિયાણી બેઠકમાં 67.10 ટકા અને સૌથી ઓછું ઉપલેટા તાલુકાની પાનેલી મોટી બેઠકમાં 42.45 ટકા નોંધાયું હતું. ગોંડલ તાલુકાની સુલતાનપુર બેઠકમાં 45.26 જસદણ તાલુકાની આબરડી બેઠકમાં 44 49 ભાડવા બેઠકમાં 47.35 અને જેતપુર તાલુકાની પીઠડીયા બેઠકમાં 52.29% મતદાન થયું છે.