જેતપુર શહેરમાં વિસેક દિવસ પૂર્વે હિન્દુ સિંધી સમાજની યુવતીને વિધર્મી યુવાન લલચાવી ફોસલાવીને લઈ ગયો હોવાની નોંધાયેલ પોલીસ ફરિયાદ બાદ પણ યુવતીનો કોઈ પતો ન લાગતા આજે વિશ્વ હિન્દુ પરિષદ દ્રારા લવ જેહાદના આક્ષેપ કરતું આવેદનપત્ર મામલતદારને આપ્યું હતું.
શહેરના જૂનાગઢ રોડ પર આવેલ યલો સ્કૂલમાં બાળકોને ભણાવતી રીંકલ મહેશભાઈ નથવાણી નામની યુવતીને તે જ સ્કૂલમાં બાળકોનું લાવવા લઈ જવા માટે વાહન ચલાવતો લાખા લતીફ ઈકબાલભાઈ નામનો વિધર્મી શખ્સ લલચાવી ફોસલાવી ભગાડી ગયો હતો. આ અંગેની ફરીયાદ યુવતીના પિતાએ સીટી પોલીસ સ્ટેશનમાં નોંધાવી હતી પરંતુ હજુ સુધી યુવતીનો કોઈ પતો લાગ્યો ન હતો.
જેથી આજે સિંધી લાડી લોહાણા સમાજ અને વિશ્વ હિન્દુ પરિષદ દ્રારા મામલતદાર અને ડીવાયએસપીને એક આવેદનપત્ર આપ્યું હતું. જેમાં જણાવેલ કે, યુવતીના પરીવારજનોએ વીસેક દિવસથી પોલીસ ફરીયાદ નોંધાવી હોવા છતાં પોલીસ કોઈ કાર્યવાહી કરતી નથી અને યારે પોલીસ સ્ટેશને જાય ત્યારે તપાસ ચાલુ છે તેવા ઉડાઉ જવાબ જ આપે છે. યુવતી સાથે કોઈ અઘટિત બનાવ ઘટયાની પરીવારજનો આશંકા વ્યકત કરે છે. જેથી લવજેહાદનો ભોગ બનેલ યુવતી અંગેની તાત્કાલીક તપાસ કરી યુવતીને શોધી તેણીના પરીવારજનોને સોંપવામાં આવે તેવી માંગ કરી હતી. અને જો પરીવારજનોને તાત્કાલીક ન્યાય નહિ મળે તો ગાંધી ચીંધ્યા માર્ગ આંદોલન ચલાવવાની ચીમકી આપી હતી