હિન્દુસ્તાન એરોનોટિક્સ લિમિટેડ (એચએએલ ) ને ભારતીય સેના અને વાયુસેના માટે 156 લાઇટ કોમ્બેટ હેલિકોપ્ટર (એલસીએચ ) બનાવવાનો ઓર્ડર મળ્યો છે. સુરક્ષા અંગેની કેબિનેટ સમિતિએ 62,500 કરોડ રૂપિયાના આ સોદાને મંજૂરી આપી દીધી છે. હવે આ કામ પૂર્ણ કરવા માટે, એચએએલ લાર્સન એન્ડ ટુબ્રો અને વેમ ટેકનોલોજી જેવી ખાનગી કંપનીઓને કામ સોંપવાની યોજના બનાવી રહી છે.

જાહેર ક્ષેત્રની કંપની એચએએલ આ પ્રોજેક્ટને એલસીએની જેમ જ પૂર્ણ કરવા માંગે છે. આ પ્રોજેક્ટમાં પણ એચએએલએ હેલિકોપ્ટરના વિવિધ ભાગો જેમ કે ફ્યુઝલેજ અને પાંખો ખાનગી કંપનીઓને આપ્યા હતા. હવે, 62,500 કરોડ રૂપિયાની ડીફેન્સ ડીલમાં, લગભગ 40 ટકા કામ ખાનગી ક્ષેત્રને આપવામાં આવશે.

જ્યારથી આ ડીફેન્સ ડીલ થઇ છે, ત્યારથી ડીફેન્સ સેક્ટરમાં ખળભળાટ મચી ગયો છે કારણ કે એચએએલ આ પ્રોજેક્ટ પૂર્ણ કરવા માટે ખાનગી કંપનીઓ સાથે પણ હાથ મિલાવશે. જો સૂત્રોનું માનીએ તો, એચએએલ ખાનગી કંપનીઓને લગભગ 25 હજાર કરોડ રૂપિયાનું કામ આપવાની યોજના બનાવી રહ્યું છે. વાસ્તવમાં, એચએએલ સંરક્ષણ ક્ષેત્રમાં ખાનગી કંપનીઓને સામેલ કરીને સંરક્ષણ ઉત્પાદનને પ્રોત્સાહન આપવા માંગે છે. આ અંગે ખાનગી કંપનીઓને ટૂંક સમયમાં ટેન્ડર બહાર પાડવામાં આવશે.

એચએએલ દેશની સૌથી મોટી એરોસ્પેસ કંપની છે. તેની પાસે 2 લાખ કરોડ રૂપિયાથી વધુના ઓર્ડર છે અને નજીકના ભવિષ્યમાં 70,000 કરોડ રૂપિયાથી વધુના ઓર્ડર મળવાની અપેક્ષા છે. આમાં ખાનગી કંપનીઓને સામેલ કરવાથી સંરક્ષણ ઉત્પાદન વધશે અને કામ ઝડપથી થશે.

હિન્દુસ્તાન એરોનોટિક્સ લિમિટેડે આ હળવા લડાયક હેલિકોપ્ટર ઊંચાઈ પરના ઓપરેશન માટે ડિઝાઇન કર્યા છે. આ એકમાત્ર એટેક હેલિકોપ્ટર છે જે ૧૬,૪૦૦ ફૂટ એટલે કે લગભગ પાંચ હજાર મીટરની ઊંચાઈ સુધી ઉડવા અને ઉતરવા માટે સક્ષમ છે. આ એલસીએચ સિયાચીન ગ્લેશિયર અને પૂર્વીય લદ્દાખ જેવા પડકારજનક ભૂપ્રદેશોમાં જમાવટ માટે યોગ્ય છે. આ હેલિકોપ્ટર અદ્યતન શસ્ત્રોથી સજ્જ છે. આમાં હવાથી હવા અને હવાથી જમીન પર પ્રહાર કરતી મિસાઇલો, રોકેટ અને ટરેટ ગનનો સમાવેશ થાય છે. આ એલસીએચ દુશ્મન ટેન્ક, બંકર અને હવાઈ ખતરાઓનો અસરકારક રીતે સામનો કરવા સક્ષમ છે. આ ઉપરાંત, તે વાયુ સંરક્ષણ પ્રણાલીને પણ નષ્ટ કરી શકે છે.

આ સોદામાં ભારતીય સેના માટે 90 અને ભારતીય વાયુસેના માટે 66 હેલિકોપ્ટરનો સમાવેશ થાય છે, જેમાં આઈએએફ સંયુક્ત ખરીદી પ્રયાસનું નેતૃત્વ કરશે. ભારતીય સેના મેક ઇન ઇન્ડિયા હેઠળ આ માટે એચએએલ સાથે એક સોદો કરી રહી છે, જેનો ઉદ્દેશ્ય વિદેશી લશ્કરી પુરવઠા પર નિર્ભરતા ઘટાડવાનો અને સ્વદેશી સંરક્ષણ ઉત્પાદન ક્ષમતાઓને વધારવાનો છે. એચએએલએ ભારતીય સેનાને પહેલાથી જ 15 એલસીએચ પહોંચાડી દીધા છે.