ખંભાળિયામાં સલાયા ફાટક પાસે આવેલી એક હોસ્પિટલ નજીક રહેતા જીતુભાઈ મુરુભાઈ ગઢવી નામના 43 વર્ષના યુવાનને હૃદયરોગનો જીવલેણ હુમલો આવી જતાં તેમનું મૃત્યુ નીપજ્યું હતું. આ બનાવની જાણ મૃતકના સંબંધી કમલેશભાઈ મુરુભાઈ ધમા (ઉ.વ. 33) એ અહીંની પોલીસને કરી છે. 

________________________________________________________________________

કોર્ટ કેસ પાછો ખેંચી લેવાનું કહીને ચંદ્રાવાડા ગામના આધેડ ઉપર હુમલો

      કલ્યાણપુર તાલુકાના ચંદ્રાવાડા ગામે રહેતા હરદાસભાઈ સાજણભાઈ ઓડેદરા નામના 50 વર્ષના આઘેડને આજથી આશરે ચારેક વર્ષ પૂર્વે આ જ ગામના રામ દેવાભાઈ ઓડેદરા નામના શખ્સે માર માર્યો હતો. જે અંગેની પોલીસ ફરિયાદ નોંધાઈ હતી. આ કેસ કલ્યાણપુરની કોર્ટમાં ચાલુ હોય, જે કેસ પાછો ખેંચી લેવા બાબતે અગાઉના મન દુઃખનો ખાર રાખી, આરોપી રામભાઈ ઓડેદરાએ ફરિયાદી હરદાસભાઈ ઓડેદરાને ગેડિયા (લાકડી) વડે બેફામ માર મારી, બિભત્સ ગાળો કાઢી, જાનથી મારી નાખવાની ધમકી આપ્યાની ફરિયાદ કલ્યાણપુર પોલીસ મથકમાં નોંધાવવામાં આવી છે.

________________________________________________________________________

ખંભાળિયા નજીક ઈક્કો કારની અડફેટે બાઈકસવાર ઈજાગ્રસ્ત

     ખંભાળિયાના રામનગર વિસ્તારમાં રહેતા નરશીભાઈ કાનાભાઈ સોનગરા નામના 51 વર્ષના આધેડ તેમના મોટરસાયકલ પર ખંભાળિયા નજીકના હાઈવે માર્ગ પર આવેલી એક હોટલ પાસેના સર્વિસ રોડ ઉપરથી જઈ રહ્યા હતા. ત્યારે આ રોડ પર રોંગ સાઈડમાં આવી રહેલી એક ઈક્કો કારના ચાલકે ગફલતભરી રીતે પોતાનું વાહન ચલાવીને નરશીભાઈ સોનગરાના મોટરસાયકલ સાથે ધડાકાભેર અકસ્માત સર્જ્યો હતો. જેના કારણે તેમને ફ્રેક્ચર સહિતની નાની-મોટી ઈજાઓ સાથે હોસ્પિટલમાં ખસેડવામાં આવ્યા હતા.

       અકસ્માત સર્જી આરોપી વાહન ચાલક નાસી છૂટ્યો હોવાનું જાહેર થયું છે. ખંભાળિયા પોલીસે અજાણ્યા ઈક્કો ચાલક સામે ગુનો નોંધી, આગળની તપાસ હાથ ધરી છે.